iklan

NASIONÁL, HEADLINE, KAPITÁL

Xefe Estadu konsidera kriminaliza produtu jornalístiku la’ós prioridade ba nasaun

Xefe Estadu konsidera kriminaliza produtu jornalístiku la’ós prioridade ba nasaun

Prezidente Repúblika, José Ramos-Horta. Imajen Tatoli/Francisco Sony

DILI, 28 juñu 2023 (TATOLI)–Prezidente Repúblika (PR), José Ramos Horta, konsidera desizaun autoridade justisa kriminaliza produtu jornalístiku la’ós prioridade boot liu iha nasaun tanba bele fó impaktu ba índise liberdade imprensa.

“Ha’u sei ko’alia ho Prokuradoria Jerál Repúblika (PJR), labele simu keixa ida válidu kedas, klaru sira tenke rejistu bainhira ema aprezenta keixa, maibé ha’u la konkorda ho ida-ne’e, tanba ne’e la’ós prioridade boot ida iha Timor,” Xefe Estadu hateten hafoin fila hosi vizita ofisiál iha Alemaña, iha Aeroportu internasionál Prezidente Nicolau Lobato, Comoro, kuarta ne’e.

Notísia relevante : Publika uzu orsamentu PGR, Xefe Redasaun Hatutan.com presta deklarasaun

Iha semana-ne’e, Jornalista mídia online Hatutan.com, Rogerio Cárceres no ninia Xefe Redasaun, Francisco Simões Belo, kumpre notifikasaun hosi Ministériu Públiku (MP) hodi presta deklarasaun iha edifísiu PJR, ligadu ho publikasaun notísia ne’ebé mensiona PJR uza osamentu hodi hala’o viajen ba Guiné-Bissau ba reuniaun Komunidade Nasaun ho Lian Portugés (CPLP, sigla portugés).

“Ha’u la hatene se PJR serbisu barak ka lae, se ser isu la barak, entaun bele bolu jornalista ida hodi  xateia tanba serbisu la barak. Jornalista hakerek buat ruma sala karik tanba nia nakar, ne’e la’ós krime boot ida, lalika lakon fali tempu ba buat sira ne’e,” nia akresenta.

Tuir Horta, jornalista hakerek buat ruma sala laiha liu konsikuénsia ba Timor no ba mundu, maibé governante sira halo buat ruma sala bele iha konsikuénsia tanba liga ho programa Governu nian no l Orsamentu Jerál Estadu.

“Kuandu lori mídia online Hatutan.com ba Tribunál, iha sorin seluk di’ak loos tanba publisidade boot loos ba Hatutan.com tanba ema nunka rona Hatutan.com maibé sira ajuda promove ona,” nia tenik.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!