Instalasaun foun Eskola 12 Novembru sei falta karteira eskolár
DILI, 29 juñu 2023 (TATOLI) – Edifísiu foun rua Eskola Sekundária Jerál (ESG, sigla portugés) 12 Novembru Bekora presiza tau karteira eskolár hamutuk 135.
Diretór Servisu Edukasaun Munisípiu Dili, Carlito da Silva, husu ba Ministériu Edukasaun atu kompleta meza no kadeira iha edifísiu rua ho sala aula neen, nune’e bele fasilita estudante sira iha prosesu aprendizajen.
“Ha’u kontente loos tanba haree rezultadu di’ak ne’ebé Ministru Edukasaun esforsu hodi finaliza konstrusaun ba edifísiu foun rua, maibé ha’u husu nafatin atu ministériu bele kontinua apoia ekipamentu iha sala aula ne’e nia laran”, Carlito da Silva ba Tatoli via telefone, kinta ne’e.
Nia salienta daudaun iha kada sala aula sira ne’e foin maka iha karteira eskolár hamutuk 16, signifika husi sala neen ne’e foin maka iha karteira eskolár hamutuk 96 de’it. Tanba ne’e presiza tan karteira hodi tau iha sala neen atubele kumpre nafatin regra sira ne’ebé maka ministériu prevee ona, liuliu redús númeru estudante kada sala ho ema 45.
Carlito da Silva solisita ba dirijente Eskola 12 Novembru no estudante sira katak bainhira hein karteira eskolár husi ministériu, tenke halo jestaun atu kuída ekipamentu sira ne’e.
“Atensaun ba estudante sira atu labele pinta didin lolon sira. Kontinua halo mós nafatin tanba edifísiu sira ne’e rikusoin eskola nian. Ha’u husu ba ita-boot sira atu halo jestaun di’ak bá eskola foun rua ne’e no kontinua hamoos kada loron hodi bele kuidadu nia ambiente limpu ba ita-boot sira inklui ba públiku sira ne’ebé mak mai vizita eskola ne’e”, afirma.
Obra edifísiu foun rua neen ne’e ninia orsamentu hamutuk $132,376.67 ne’ebé tama iha Projetu Konstrusaun no Reabilitasaun Infraestrutura Eskolár. Edifísiu foun rua ne’e Ministru Edukasaun entrega ona ba eskola iha segunda (26/06) foin lalais ne’e.
Notísia relevante: MEJD entrega edifísiu rua ba Eskola 12 Novembru
Jornalista: Tomé Amado
Editora: Maria Auxiliadora
