DILI, 29 juñu 2023 (TATOLI)–Primeiru-Ministru (PM) indijitadu no atuál Prezidente Partidu Congresso Nacional para a Reconstrução de Timor-Leste (CNRT), Kayrala Xanana Gusmão, prefere membru IX Governu prienxe kritériu tolu.
“Kritériu ne’ebé ami lori atu hili, dahuluk nesesidade atu halo saida, daruak mak esperiénsia ruma no datoluk maka ema ne’ebé ita bele dehan katak ita fó tiha servisu, tanba ami iha kompromisu atu serbí la’ós atu ba sai ministru, tanba ne’e la hatene servisu ema seluk tenke tama tanba prinsípiu partidu rua ne’e nian ba Governu maka ba atu servisu,” Xanana Gusmão hateten hafoin hasoru Prezidente Repúblika, José Ramos Horta, ita Palásiu Prezidensiál, Bairru Pité, kinta ne’e.
Xanana Gusmão dehan bainhira IX Governu simu pose, kada semana sei troka hanoin nafatin no komprometidu serbí povu no nasaun.
“Ami hasoru malu ho Prezidente Repúblika hodi dehan ba katak partidu rua (CNRT no PD) komprometidu atu hala’o servisu ba nasaun ida-ne’e no sei buka esforsu hotu, la’ós de’it atu kurriji buat ne’ebé keta la’o ladi’ak karik, maibé atu hatutan buat ne’ebé uluk hala’o tiha ona no ita hatene katak buat barak ne’ebé ita bele halo para ukun-an ne’e bele hetan nia sentidu loloos, sentidu kona-ba dezenvolvimentu sustentável no dezenvolvimentu ne’e maka bele kria kondisaun ba povu bele moris di’ak, lae ukun-an laiha sentidu loos,” nia akresenta.
Notísia relevante : Maioria kuadru partidu CNRT konkorda koliga ho PD forma IX Governu
Haree ba kondisaun atuál, líder nasionál ne’e hakarak forma ekipa forte hodi halo servisu.
“Ha’u presiza ekipa ida forte no tenke forte duni, atu ekipa kiik ka boot maibé ha’u presiza ekipa ida forte,” nia afirma.
Iha loron 29 juñu Prezidente Repúblika konvoka enkontru ho Primeiru-Ministru indijitadu, tuir mai iha loron 30 juñu publika dekretu Prezidente Repúblika, no loron 01 jullu 2023 loron ba tomada pose ba IX Governu Konstitusionál, ne’ebé sei realiza iha resintu Palásiu Prezidensiál Bairru Pité iha tuku 16:00.
Bazeia ba rezultadu Eleisaun 2023, Partidu CNRT hetan votu maioria hamutuk 288.101 (41,62%) kadeira 31 iha Parlamentu Nasionál, tuir fali Partidu Frente Revolucionária de Timor-Leste Independente (FRETILIN) ho votu 178.248 (25,75%) kadeira 19, Partidu Demokrátiku (PD) ho votu 64.493 (9,32%) kadeira neen, Partidu Kmanek Haburas Unidade Nasionál Timor-oan (KHUNTO) ho votu 52.021 (7,52%) kadeira lima no Partidu Libertasaun Populár (PLP) ho votu 40.696 (5,88%) kadeira haat no partidu seluk la liu barreira.
Totál eleitór iha territóriu nasionál hamutuk 890.145, eleitór ne’ebé tuir vota hamutuk 705.693, enkuantu taxa partisipasaun 79,28%, kompostu hosi feto 343.278 (48,64%) no mane 362.415 (51,36%), votu válidu 692.521 (98,13%), votu branku 2.698 (0,38%), votu nulu 10.387 (1,47%), votu rejeitadu 61 (0,01%), no votu reklamante 0.
Nune’e, hosi rezultadu Eleisaun Parlamentár 2023, Partidu CNRT deside forma IX Governu hamutuk ho PD.
Jornalista : Antónia Gusmão
Editora : Julia Chatarina
