DILI, 29 juñu 2023 (TATOLI)–Prezidente Parlamentu Nasionál (PPN), Maria Fernanda Lay, hamutuk ho estrutura meza Parlamentu Nasionál (PN), kinta ne’e, hasoru malu ho Prezidente Repúblika (PR), José Ramos Horta, hafoin asume knaar lidera meza Parlamentu.
“Konserteza iha área diplomasia, ha’u konta ho apoia no breafing hosi Prezidente Repúblika para ita labele halo sala bainhira bá iha rai seluk, hanesan iha Estadu Unidu, ha’u hanoin ba fatin sira ne’e presiza apoia la’ós de’it ba Prezidente maibé mós deputadu sira hotu,” PPN Maria Fernanda Lay hateten hafoin hasoru malu ho Xefe Estadu, iha Palásiu Prezidensiál, Bairru Pité, kinta ne’e.
Tuir PPN, objetivu loloos hasoru malu ho PR atu komprimenta tanba momentu simu pose, Xefe Estadu hala’o hela vizita Estadu iha rai-li’ur.
“Mai komprimenta Prezidente Repúblika tanba iha tomada pose ha’u nian, Prezidente Repúblika laiha ne’e, ne’ebé ha’u hanoin oportunidade di’ak tebes tanba Prezidente Repúblika fila ona, entaun ami husu audiénsia para mai aprezenta meza tomak Parlamentu nian. Ami seidauk tama to’o matéria tanba ami mós lakohi kebra protokolu ninia regra, ne’ebé ami mai komprimenta de’it,” nia tenik.
Notísia relevante : PR Horta rekoñese kapasidade Maria Fernanda Lay lidera Parlamentu
Biban ne’e, Maria Fernanda Lay dehan katak antes ne’e nia la mehi atu sai ema númeru ida iha Parlamentu, maibé tanba fiar nia prontu asume knaar ne’e ho responsabilidade.
“Foin primeira vez iha Timor, feto ida sai Prezidente Parlamentu. Ha’u rasik konfirma no deklara iha Prezidente Repúblika nia oin katak ha’u la mehi atu sai Prezidente Parlamentu, ne’e primeira esperiénsia,” nia tenik.
Deputada hosi Bankada Governu Partidu Congresso Nacional para a Reconstrução de Timor-Leste (CNRT), Maria Fernanda Lay, eleitu nu’udar feto dahuluk sai nu’udar Prezidente Parlamentu Nasionál iha lejizlatura daneen, iha loron 22 juñu 2023.
Iha loron 26 juñu 2023, PN kontinua halo eleisaun ba kompozisaun meza, ne’ebé ho rezultadu Deputada Maria Teresinha Viegas (CNRT) eleitu ba Vise-Prezidente I no Alexandrino Afonso Nunes hosi Partidu Demokrátiku (PD) sai Vise-Prezidente II.
Sekretária meza PN, Virginia Ana Belo (CNRT) no Sekretária Meza PN I, Maria Teresa da Silva Gusmão (PD) no Sekretária Meza PN, Bendita Moniz Magno (CNRT).
Jornalista : Antónia Gusmão
Editora : Julia Chatarina
