Selebrasaun Idul Adha 1444H hametin fiar ba Maromak
DILI, 29 junu 2023 (TATOLI)—Prezidente Komunidade Musulmanu iha Timor-Leste, Pascoal Sidik “Lemorai”, loron Idul Adha 1444H ne’e loron fiar ka tradisaun musulmanu sira iha mundu katak Idul Adha ne’e mós hanesan selebrasaun loron ‘ haji ‘ no mós hanaran “Idul Qurban”, tanba iha loron ne’e mak Maromak fó oportunidade ba nia emar sira atu bele hakbesik aan ba Nia.
Notísia Relevante: Selebrasaun Idul Adha, musulmana iha Baucau husu líder sira unidade
Nia hatutan, selebrasaun Idul Adha 1444H ne’e hanesan tradisaun ida ba ema Musulmanu sira iha mundu tomak kada tinan hodi selebra loron Idul Adha atu hametin fiar ba Maromak.
“Signifikadu hosi Idul Adha ne’e hanesan dutrina ida ba ami, oinsá atu hametin ami-nia fiar. Tuir profeta Abrão ne’ebé halo teste fiar nian makaas liuhosi nia oan mane profeta Ismael, oinsá fó fiar ba Nai Maromak hodi hametin ami-nia fiar ba Maromak,” nia hateten ba jornalista sira iha Maskita An-nur, Kampung Alor, kinta ne’e.
Loron Idul Adha ne’e hanesan loron boot ba ami musulmanu sira, ohin ami selebra loron ne’e katak momentu profeta Ismail koko nia oinsá nia bele ezekuta servisu ne’ebé Maromak ba no Maromak koko nia pasiensia iha ka lae, pasiensia ba servisu ne’ebé Maromak fó, tanba ne’e komunidade musulmanu halo tuir de’it istória ne’ebé iha.
Nia dehan, iha loron ne’e Musquita Anur oho karau ualu (8) no oho bibi sia (9) hodi fahe ba komunidade kbiit laek sira.
“Selebrasaun loron Idul Adah, iha Timor-Leste munisípiu neen (6) mak realiza atividade reza no oho karau fahe ba komunidade. Ita Timor-Leste Musquita Anur iha Baucau, Lautém, Dili, Manufahi, Liquiça no Viqueque, mak ohin loron halo selebrasaun Idul Adah no ami Mesquita Anur Dili mak oho karau ualu ho bibi sia. Maibé, karau ida apoiu hosi ita-nia líder nasionál, Mari Alkatiri no seluk hosi komunidade musulmanu sira no parte Governu no Palásiu Prezidensiál seidauk fó, ami hein de’it,” nia hateten.
Komunidade Musulmanu, Koamal Dewi Lobato, hateten loron Idul Adah importante liu ba sarani musulmanu sira iha mundu.
“Loron Idul Adah ne’e ita tenke agredese no kontente tanba sei hasoru malu fali ho ita-nia maluk sira hotu, no iha loron Idul Adah ne’e ita fó kontribuisaun saida mak ita iha hanesan karau ho bibi, hodi kontribui ba ita-nia maluk ne’ebé laiha kbiit,” Koamal Dewi dehan.
Ba musulmanu sira-ne’ebé seidauk iha kbiit halo servisu “haji”, mak nia hetan oportunidade atu hasaran animal ka “qurban” hodi oho animál hanesan símbolu hamta’uk no hadomi Nai Maromak liu sasán hotu-hotu.
Nia hateten, kada tinan musulmanu sempre kontribui karau no bibi ba komunidade ne’ebé laiha kbiit, ida-ne’e ami kontinua de’it no la’o tuir saida mak hahú ona desde loron Idul Adah nian.
Komunidade musulmanu iha Timor-Leste liu-liu ne’ebé najlekar iha ha munisípiu neen ne’e ninia total ema besik 23.000-25.000.
Jornalista : Osória Marques
Editór : Cancio Ximenes
