Autoridade Covalima fó atensaun ba komunidade hela iha fatin risku
COVALIMA, 30 juñu 2023 (TATOLI)–Autoridade Covalima liuhosi Servisu Munisipál Protesaun Sivil Jestaun no Dezastre Naturál fó atensaun ba komunidade suku Beco, Camnasa, Suai Loro, Casabauk no Raimea ne’ebé hela besik fatin risku hanesan mota ninin, foho lolon no tasi ibun.
“Iha covalima hahú udan daudaun, nune’e servisu Munisipál Protesaun Sivil Jestaun no Dezastre Naturál fó atensaun komunidade hela besik iha mota ninin, tasi-ibun, foho hun, fó atensaun bainhira udan tenke prepara aan, nune’e bainhira udan makaas labele afeta ba ita,” Diretór Servisu Munisipál Protesaun sivil Jestaun no Dezastre Naturál, Quintino da Costa, hateten ba Agência Tatoli, iha nia kna’ar fati, Bairru Costa, sesta ne’e.
Komunidade ne’ebé hela besik mota ninin, foho lolon no tasi ibun tenke prepara aan no prepara aihan maran sira, nune’e bainhira iha tempu udan la konsege atu tein karik bele aguenta han hahan maran ne’ebé prepara ona.
Protesaun sivil identifika komunidade ne’ebé risku ba dezastre naturál hanesan suku Suai Loro, Camnasa, Beco, Casabauk, Salele no Raimea ne’ebé sempre akontese inundasaun, ne’ebé estraga komunidade nia hela fatin no plantasaun.
Nia husu ba komunidade tenke atensaun no prepara aan hodi prepara hahan maran no proteje dokumentu importante sira.
Tuir dadus iha trimestre dahuluk, Servisu Munisipál Protesaun sivil Jestaun no Dezastre Naturál rejista uma kain ne’ebé afeta ba dezastre naturál hamutuk 131, ne’ebe ho tipu dezastre naturál hanesan anin boot estraga uma 121, inséndiu rua (2), rai halai hitu (7), aat natoon 19, aat kmaan 64 no aat totál 46 ne’ebé vítima sira hetan hotu ona apoiu emerjensia.
Jornalista : Celestina Teles
Editór : Cancio Ximenes
