Bankada parlamentár koloka ona Deputadu sira ba komisaun espesializada permanente
DILI, 30 juñu 2023 (TATOLI)—Bankada parlamentár hanesan CNRT, FRETILIN, PD, KHUNTO iha Parlamentu Nasionál (PN) koloka ona Deputadu sira ba kada Komisaun espesializada permanente sira.
Notísia Relevante: Maria Fernanda Lay feto dahuluk lidera lejislatura daneen
Vise bankada CNRT, Patrocínio Fernandes, hateten provizóriu bankada sei ajusta no koloka tuir Deputadu kada komisaun na’in-lima, tanba ida-ne’e importante mak iha Komisaun atu garante votu maiória iha kualkér deliberasaun no sei haree mós lidera meza balansu iha meza komisaun sira ho PD.
“Parlamentu tuir rejimentu la taka dalan opozisaun ba lidera meza Komisaun, maibé hanesan meza Komisaun liuhosi prosesu eleisaun,” nia hateten ba jornalista sira iha PN, sesta ne’e.
Vise bankada FRETILIN, David Dias Ximenes ‘Mandati’, hateten bankada iha lejislatura daneen ne’e iha Deputadu na’in-19 ne’ebé sei koloka ba komisaun hotu no kada komisaun koloka Deputadu balun rua (2) no balun tolu (3).
Nia hateten, hanesan bankada opozisaun la signifika inimigu maibé parseiru polítiku, diferensa iha hodi dinamiza, polítika bele ida de’it, diferensa iha pensamentu oinsá mós prinsípiu kontraditóriu ne’e hodi dinamiza.
Vise bankada KHUNTO, Deputadu António Verdiál de Sousa, hateten lejislatura ne’e KHUNTO iha Deputadu na’in-lima no kolokasaun membru Deputadu KHUNTO ba de’it komisaun lima hanesan A, B, C, D no E.
“Tanba la hanesan uluk bankada ki’ik ne’ebé hetan asentu iha Parlamentu, nia sempre Deputadu ida akumula fatin rua, agora regra sesta lejislatura regra ne’ebé iha Deputadu sira tenke hala’o kna’ar iha komisaun ida de’it. Ho objetivu, atu Deputadu foku ba serbisu iha komisaun espesializada permanente,” nia hateten.
Iha reuniaun lidér bankada parlamentár ne’ebé lidera hosi Prezidente Parlamentu Nasionál iha loron hirak ba kotuk, parte bankada KHUNTO hato’o atu iha fleksibilidade hosi meza atu nune’e Deputadu KHUNTO balun hola parte mós ba komisaun F no komisaun G mezmu laiha direitu votu.
Antes ne’e, Prezidente Bankada PD, Deputadu António da Conceição ‘Kalohan’, hateten bankada husu ba iha partidu koligasaun hodi bankada PD bele lidera sai hanesan Prezidente ba Komisaun B trata asuntu Negósiu Estranjeiru no Defeza ho Segunda ho Komisaun D trata asuntu Ekonómia.
“Ami husu atu kaer pasta komisaun rua ne’e mós depende. Kuandu ami hatene ona katak, dalaruma ha’u ho deputadu Asanami la’ós Deputadu ona karik, entaun ami sei haree deputadu PD nian sira mai ne’e bele halo iha komisaun ida-ne’ebé no tenke forte,” nia hateten.
PD hakarak lidera komisaun espesializada ekonomia tanba PD ho nia lema “Maubere oan prontu atu servi”, hodi servi povu nia oan sira iha foho no ba komisaun B karik iha futuru mai iha Ministru ruma ne’ebé asume pasta Ministéiru Negósiu Estranjeiru no Kooperasaun (MNEK).
Nia dehan, partidu koligasaun rua hanesan CNRT no PD halo ona komunikasaun ba kestaun ne’e hodi bele asume komisaun refere.
Bankada mós koloka nia membru Deputadu ba komisaun sira sei haree tuir Deputadu/a ne’e nia koñesimentu hodi hala’o serbisu di’ak liután.
Enkuantu jornalista destakadu iha PN, iha sesta ne’e, tenta konfirma ho Prezidente bankada PLP, Deputada Maria Angelina Sarmento, iha bankada kona-ba kolokasaun Deputadu PLP ba komisaun sira maibé laiha fatin.
Ho kolokasaun deputadu hosi bankada parlamentár ba komisaun espesializada permanente sei fó anúnsiu iha plenária hosi meza no sei iha eleisaun ba Prezidente no Vise Prezidente Komisaun ho sekretária ne’ebé sei hala’o iha kada komisaun.
Enkuantu iha lejislatura daneen ne’e, partidu koligasaun CNRT ho kadeira 31 no PD ho kadeira neen (6), ne’ebé ho forsa polítika maiória parlamentár kadeira 37, enkuantu bankada opozisaun FRETILIN ho kadeira 19, KHUNTO kadeira lima (5) no PLP kadeira haat (4).
Jornalista : Nelson de Sousa
Editór : Cancio Ximenes
