DILI, 30 juñu 2023 (TATOLI)-Arserbispu Arkideoseze Díli, Dom Virgilio Kardeál Do Carmo da Silva,SDB, husu ba membru Polísia Nasionál Timor-Leste (PNTL) atu hala’o knaar banati tuir doutrina Santo António hodi sai protetór ba povu no nasaun.
“Servisu polísia ninian ne’e la’ós servisu ne’ebé fasil. Iha presenza Santo António nian ne’e furak mós ba ita-bo’ot sira (membru polisía), tanba iha dadeer kuandu sama ain molok atu ba servisu liuhosi ne’ebá (estatua) la halo orasaun naruk mós la buat ida, lori ai-funan oan ida ka halo de’it sinál kruz oan ida hodi fó hanoin ita-bo’ot sira katak kna’ar ida ne’ebé ha’u halo ne’e, kna’ar ida sagradu, kna’ar ida ne’e lulik, kna’ar ida ne’e atu halo akompaña, la’o hamutuk ho povu ida ne’e tau-matan ba Maromak nia povu ida ne’e ba. Ita-bo’ot sira ida ne’e maka vokasaun polísia nian,” Dom Virgilio Kardeál Do Carmo da Silva hateten.
Líder igreja Katólika Timor-Leste ne’e, perante jornalista sira hafoin remata serimónia inaugurasaun no fó bensaun ba estatua Santo António iha Komandu Eskuadra Remexio, sesta ne’e, kompara amu-lulik sira simu vokasaun ne’e atu haklaken (evanjellu) no fó sakramentu, enkuantu polísia tau-matan ba povu no nasaun.
Nu’udar polísia, tuir Nai-lulik ne’e katak atu tau orden ba iha rai no ba povu ida ne’e. Dala barak dezafiu bo’ot ba polísia hasoru dezafiu, maibé polísia atu servisu atu ajuda loos duni. Maibé, mós polísia ema; nu’udar ema labele halai sees hosi nian natureza ema ninian.
“Nu’udar polísia simu kna’ar ida atu akompaña povu ne’e atu fó hanoin, loloos polísia sira ne’e hanesan anju da guarda katak, bainhira polísia nian presenza barak liu mak dala barak ne’e buat ida violensia ne’e mós laiha, maibé kuandu la haree polísia iha fatin-fatin kapaseti mós ema la uza,” Dom Virgilio Kardeál Do Carmo da Silva hateten.
Iha biban ne’e, Dom Virgilio Kardeál Do Carmo da Silva kongratula Komandu PNTL Eskuadra Remexio tanba ho inisiativa harii estuatua monumentu Santo António iha sira-nia resintu.
“Ita-nia munisipiu sira ne’e iha hotu ona hahú tama iha Postu sira iha ne’ebé Komandante Eskudra sira ho sira-nia inisiativa rasik harii monumentu Santo António nian, ita agradese i ha’u kongratula sira ba sira nian esforsu ida ne’e, tanba ita haree katak sira hotu mesak sarani,” amu kongratula.
Nia dehan, dala barak PNTL nian servisu ne’e ejize la’ós de’it forsa maibé halo sira mós dala barak lakon korajen.
“Harii Santo António ninian Estatua atu fó hanoin mós ba sira katak ita hala’o buat hothotu, maibé ikus liu husik mós Maromak hola parte iha misaun ne’ebé ba iha orden, estabilidade, ita sura mós Maromak nia tulun,” Dom Virgilio Kardeál Do Carmo da Silva adianta.
Kardeál ne’e subliña Timor-Leste nasaun nee maioria fi’ar-na’in Kátoliku, devosaun bo’ot ba Santo António. “Ha’u hanoin katak ne’e oportunidade di’ak ba ita-nia polísia atu ajuda mós ejerse di’ak liután sira nia kna’ar, nu’udar sira ne’ebé tau-orden ba iha rai ida ne’e,” nia afirma.
Iha fatin hanesan, Komandante Jerál PNTL, Komisariu Jerál Polísia, Henrique da Costa, husu ba membru sira hotu nafatin aprende tanba servisu PNTL ne’e atu servi povu ba komunidade sira.
“Nafatin hatudu ita-nia disiplina, ita-nia servisu di’ak, para hatudu servisu ne’ebé di’ak, tanba kuandu sira (povu)laiha ita mós sei la tau farda ida ne’e. Tanba ne’e mak ita tau farda ida ne’e hodi servi sira. Husu ba ita-bo’ot sira atu servi ita-nia povu, ita-nia sidadaun sira, tantu nia hosi ne’ebé de’it, ita tenke atende, ita-nia atendimentu profisionalizmu ba ema hotu,” nia enkoraja.
Nia adianta, hanesan Komandante Jerál PNTL sei halo programa ida vizita ofisiál ba Komandu munisipiu sira, hafoin formasaun Governu.
Komandante Jerál PNTL ne’e mós rekoñese molok hetan deviza Komandante Jerál liuhosi prosesu hahú hosi Komandante PNTL Eskuadra Remexio iha tinan 23 liu ba kotuk.
Tanba ne’e, nia parte agradese ba buat hirak ne’ebé nia atinji durante ne’e mós la sees hosi apoiu orasaun hosi família no ema hotu iha Remexio.
“Ita iha la bo’ot liu kbi’it Nai Maromak nian mas ho ita-nia esforsu, ita-nia orasaun buat ne’ebé mak Nain haraik mai ita, dala ruma ita la espera, maibé buat ne’e sei realiza,” Komisariu Jerál Polísia Herique da Costa konklui.
Entretantu, seremónia inaugurasaun ba estatua Santo António iha Komandu Eskuadra Remexio, sesta ne’e, inaugura no fó bensa hosi Aserbispo Arkideoseze Díli, Dom Virgilio Kardeál Do Carmo da Silva,SDB no hetan akompañamentu hosi Komandante Jerál PNTL, Komisariu Jerál Polísia, Hemrique da Costa, partisipa hosi Komandante PNTL Interinu Munisípiu Aileu, Munisípiu Ainaro, Manufahi inklui membru PNTL Komandu PNTL Aileu no Komandante Eskuadra Remexio rasik, Lequidoe Laulara no Aileu Villa.
Iha biban hanesan Arsebispu Arkideoseze Díli, Dom Virgilio Kardeál Do Carmo da Silva,SDB inaugura no fó bensa ba Um-Laku no Rate ida ne’ebé lokaliza iha Igreja Parokia Remexio.
Jornalista: Natalino Costa
Editór : Rafael Ximenes de A. Belo
