HEADLINE, KAPITÁL

Embaixadór Reinu Unidu sei kria paktu unidade nasionál dame arte-marsiál

Embaixadór Reinu Unidu sei kria paktu unidade nasionál dame arte-marsiál

Embaixadór Timor-Leste iha Reinu Unidu, João Paulo da Costa Rangel. Imajen Tatoli/Francisco Sony

DILI, 30 juñu 2023 (TATOLI)—Embaixada Timor-Leste iha Reinu Unidu iha tempu badak sei estabelese paktu unidade nasionál dame entre arte-marsiál hotu iha Reinu Unidu hodi evita konflitu ne’ebé dala-ruma akontese.

Embaixadór Timor-Leste ba Reinu Unidu, João Paulo da Costa Rangel, hateten, daudaun ne’e, nia parte hahú ona halo kontaktu dahuluk ho organizasaun arte-marsiál timor-oan sira iha Reinu Unidu no líder komunidade timor-oan hodi hamutuk unifika organizasaun sira.

“Ita espera iha tempu badak, iha tinan-ne’e nia-laran ita konsege halo paktu unidade nasionál dame entre arte-marsiál hotu iha Reinu Unidu. Atu evita konflitu, ami-nia hanoin no hakarak molok Prezidente Repúblik, José Ramos Horta bá vizita Reinu Unidu,” Embaixadór dehan iha Hotel Timor, Colmera, sesta ne’e.

Notísia relevante : Timor-oan iha Reinu Unidu presiza instalasaun ba renovasaun pasaporte

Ho esforsu hotu, daudaun sira halo ona maibé buat hotu sei la’o tuir nia tempu.

“Ita espera bainhira hamosu paktu unidade nasionál dame, joven sira bele kria pás no haluha konflitu, hanoin mak serbisu hodi ajuda família no nasaun iha Timor-Leste,” nia akresenta.

Diplomata ne’e husu ba timor-oan sira ne’ebé serbisu iha rai-li’ur atu kria unidade ba malu.

“Husu ba timor-oan sira ne’ebé serbisu iha Reinu Unidu, tenke hamutuk hanesan ohin loron ita-nia líder sira hakuak malu, hamutuk kria pás tanba liafuan ida pás ne’e mak sei bele lori ita ba oin. Tanba bainhira ita hamutuk ona no kria pás bele dignifika ita-nia eroi sira ne’ebé mate tanba rai ida-ne’e,” nia tenik.

Xefe Komunidade timor-oan ne’ebé daudaun serbisu hamutuk ho Embaixadór Reinu Unidu atu estabelese paktu unidade iha Reinu Unidu mak Xefe Komunidade Celsio de Oliveira toma konta iha Peterborough, Xefe Komunidade Roy Agustinho da Silva Setiawan toma konta iha Irlándia Norte no Elvelisa Jerónimo toma konta iha sidade Bridgewater.

Jornalista     : Arminda Fonseca

Editora          : Julia Chatarina  

iklan
iklan

Leave a Reply

iklan
error: Content is protected !!