DILI, 30 juñu 2023 (TATOLI)—Timor-oan iha Reinu Unidu ne’ebé uza pasaporte Timor, daudaun ne’e presiza instalasaun ruma hodi halo renovasaun pasaporte inklui dokumentu seluk.
“Timor-oan sira hasoru difikuldade hanesan pasaporte mate presiza halo renovasaun. Timor-oan sira ne’ebé uza pasaporte Timor hodi bá serbisu iha Reinu Unidu presiza instalasaun renovasaun pasaporte, Billete Identidade (BI) Timor nian, inklui sertidaun RDTL. Ita konta timor-oan 1.000 resin ne’ebé serbisu iha Reinu Unidu presiza halo renovasaun. La’ós hosi sidade Irlándia de’it maibé hosi Inglatera no konta iha Reinu Unidu tomak,” Xefe Komunidade timor-oan iha Bridgewater Inglatera, Elvelisa Jerónimo, hateten iha Hotel Timor, Colmera, sesta ne’e.
Nia dehan, timor-oan sira eziji Governu bele ajuda tanba balun lori oan eskola no balun serbisu.
“Esforsu ne’ebé ami halo mak serbisu hamutuk ho Embaixadór Timor-Leste iha Reinu Unidu hodi hato’o difikuldade sira ne’e hodi buka dalan atubele rezolve,” nia akresenta.
Notísia relevante : Reinu Unidu apoiu Timor-Leste nia adezaun ba ASEAN
Iha fatin hanesan, Xefe Komunidade timor-oan iha Irlándia Norte, Roy Agustinho da silva, hateten, bazeia ba dadus tinan 2021, iha timor-oan 400 resin mak pasaporte mate no presiza renova.
“Entaun momentu ne’ebá ekipa apoiu ona halo renovasaun pasaporte, maibé momentu ne’ebá barak liu labarik sira. Maibé liu tinan 2021, dadus konkretu laiha, ita bele dehan katak timor-oan 800 to’o 1.000 hosi parte Irlándia Norte, inklui Inglatera iha 600 mak presiza renova pasaporte,” nia tenik.
Maski nune’e, timor-oan sira sente kontente ho prezensa Emabixadór Reinu Unidu foun.
“Ami serbisu maka’as hodi buka solusaun hodi ajuda timor-oan sira ne’ebé iha Reinu Unidu, liu-liu sira ne’ebé ho pasaporte Timor tanba kontribuisaun hosi traballadór timor-oan iha Reinu Unidu mai Timor boot tebes,” nia dehan.
Nune’e mós, Embaixadór Timor-Leste iha Reinu Unidu, João Paulo da Costa Rangel, hateten, nia parte no Xefe Komunidade sei hato’o preokupasaun hirak ne’e ba membru Governu foun.
“Ami ne’ebé mai ho delegasaun ne’e hetan karta formál hosi Prezidente Repúblika atu partisipa serimónia tomada pose ba membru Governu foun. Ami mai reprezenta traballadór timor-oan hotu iha Reinu Unidu, durante ami-nia estadia iha ne’e durante semana ida, ami mós iha reuniaun balun ho membru Governu foun, Prezidente Parlamentu Nasionál, Prezidente Repúblika, no Primeiru-Ministru atu ko’alia kona-ba oinsá ami bele serbisu hamutuk di’ak hodi promove ita-nia rai no defende timor-oan sira ne’ebé agora hela iha Reinu Unidu,” nia adianta.
Jornalista : Arminda Fonseca
Editora : Julia Chatarina
