Jestu Xanana no Taur hakuak malu lori ksolok ba povu TL

DILI, 30 juñu 2023 (TATOLI)—Deputadu bankada KHUNTO iha Parlamentu Nasionál, António Verdiál de Sousa, hateten aktu lidér nasionál Xanana Gusmão no Taur Matan Ruak hasoru malu, kaer liman no hakuak malu ne’e lori ksolok ba povu Timor-Leste (TL) hodi bele hamutuk lori dezenvolvimentu nasaun no ba povu.

Notísia Relevante: Xanana Gusmão hasoru Taur Matan Ruak iha Palásiu Prezidensiál

“Hodi bankada KHUNTO nia naran atu hateten de’it, hakslok haree jestu no atetude ne’ebé hakuak malu ksolok ba povu Timor-Leste iha biban minutu ikus atu hakotu mandatu VIII Governu KOnstitusionál,” nia hateten ba jornalista sira iha uma fukum Parlamentu Nasionál, sesta ne’e.

Entretantu, sesta ne’e, Prezidente Repúblika, José Ramos Horta, hala’o enkontru ho Primeiru Ministru, Taur Matan Ruak ho Primeiru-Ministru Indizitadu ba IX Governu iha Palásiu Prezidensiál Nicolau Lobato, Bairru Pite, hodi ko’alia tranzisaun ba Governu foun, iha ne’ebé Xanana ho Taur ka’er liman no hakuak malu ho oin midar.

Vise bankada KHUNTO, Deputadu António Verdiál, hateten nia parte laharee ba perspetiva polítika maibé nia hakarak haree hosi perspetiva kulturál ema Timor tanba ida-ne’e mak kultura, importante atu ba ne’ebé no fila ba ne’ebé de’it no mai hosi ne’ebé, ba iha ne’ebé importante respeita malu, solidariedade no fó liman ba malu no hakuak malu.

“Aktu ne’e, hanesan ezemplu ida ba povu, liu-liu ba jerasaun foun sira-ne’ebé partisipa iha polítika, hodi banati tuir respeita malu, Timor sei unidade atu ita hotu bele haburas unidade nasionál entre timoroan,” nia dehan.

Vise bankada CNRT, Patrocínio Fernandes, hateten ida-ne’e normál tanba Timor nia kultura.

“Ita sosiedade Timor ne’e hanesan alerjia ho ema ka’er liman no hakuak malu, ita haree de’it ema ruma ka’er liman no hakuak malu ita hanoin ne’e problema polítiku, hanoin ne’e normal. Iha fatin ruma, ema hasoru malu kaer liman no hakuak malu uitoan ne’e kultura Timor nian. Saida tan, ema sira-ne’e, iha sira nia pasadu ne’ebé agora ita ba dezenvolve buat sira-ne’e sai issue ruma no ema bele espekula buat sira ne’e. Ba ha’u, hanoin buat sira-ne’e pozitivu no normál tanba ema ida ho ema ida hasoru malu kaer liman hakuak malu,” nia dehan.

Deputadu FRETILIN, David Dias Ximenes ‘Mandati’, hateten iha kontextu saida ba Primeiru Ministru no ida Primeiru Ministru indizitadu tenke entrega serbisu hand over, tenke hasoru malu, entaun hasoru malu hamnasa no kaer liman no hakuak malu.

Notísia Relevante: Taur disponível apoia governasaun lideradu hosi Xanana Gusmão

Jornalista : Nelson de Sousa

Editór        : Cancio Ximenes