DILI, 30 juñu 2023 (TATOLI)—Vise-Ministru Komérsiu no Indústria, Domingos Lopes Antunes, konsidera mikro, pekena no média empreza importante tebes ba dezenvolvimentu nasaun.
“Tuir istória ekonomia rejionál iha Ázia, mikro, pekena no média empreza importante tebes tanba bainhira mosu situasaun krize boot no ekonomia paradu, só mikro, pekena no média empreza mak bele halo moris fali. Ida-ne’e signifika importante tebes ba dezenvolvimentu nasaun nian,” Vise-Ministru hateten ba Agência Tatoli iha ni nia knaar fatin, Bebora, sesta ne’e.
Governante ne’e nota, nasaun boot sira iha Ázia hanesan Singapura, Vietname, Malázia no Indonézia to’o agora dezenvolvimentu la’o maka’as tanba prezensa mikro, pekena no média empreza ne’ebé hamosu kampu serbisu ba komunidade.
“Iha Timor-Leste ita presiza hetan suporta hosi mikro, pekena no média empreza atubele loke kampu traballu barak tanba ho ninia ezisténsia no luta ne’e importante ba nasaun nia ekonomia, tanba ita foin harii ita-nia nasaun iha tinan 2002, iha buat barak ne’ebé presiza halo,” nia akresenta.
Notísia relevante : Empreza 22 sai manán-na’in ba programa kréditu suave hosi MTKI
Tuir dadus hosi Servisu Rejistu no Verifikasaun Emprezariál, Institutu Públiku (SERVE, I.P) rejista ona empreza to’o 8.000 iha tinan 2022, ne’ebé maioria hanesan mikro, pekena no média empreza.
“Maibé sei iha mós sira ne’ebé setór formál, signifika seidauk hetan rejistu hosi SERVE, I.P maizumenus 75%. Ida-ne’e kontribui boot ba ekonomia nasaun nian. Sira ne’e tenke sai parseiru di’ak ba Governu hodi rezolve problema kona-ba menus kampu serbisu no seluk tan,” Vise-Ministru tenik.
Haree ba importánsia hosi mikro, pekena no média empreza, durante mandatu VIII Governu kontinua halo promosaun, ne’ebé fó apoiu instituionionál iha situasaun emerjénsia sira, formasaun ba kriasaun empreza, apoiu fundu liuhosi kréditu suave, no seluk tan.
“Ita rekomenda ba Governu foun mai atu kontinua programa sira ne’ebé iha ona, liu-liu apoiu joven sira fó dalan hodi asesu ba iha setór produtivu sira,” nia hameno.
Jornalista : Arminda Fonseca
Editora : Julia Chatarina
