Top

PN sai fatin lori aspirasaun no liberta feto hosi diskriminasaun

Deputada bankada CNRT, Veneranda Lemos. Imajen Tatoli/António Daciparu.

DILI, 03 jullu 2023 (TATOLI)—Deputada bankada CNRT, Veneranda Lemos, hateten PN kontinua sai fatin lori aspirasaun feto hodi liberta feto hosi diskriminasaun oioin ne’ebé akontese ba feto Timor-Leste.

Notísia Relevante: PPN Maria Fernanda Lay sai feto exemplár ba feto Timor-Leste

“Atu dehan de’it katak, luta ne’ebé mak ita ninia pioneria sira-ne’ebé mak hahú dezde ukun ida ne’e to’o ita hetan rezultadu maibé ita la kontente to’o de’it iha ne’e. Maibé, ita sei nafatin kontinua atu bele lori aspirasaun feto Timor-Leste hotu-hotu ninian mai iha uma fukun hodi bele liberta feto hosi diskriminasaun oioin,” Deputada CNRT ne’e hateten liuhosi intervensaun reuniaun plenária Parlamentu Nasionál, segunda ne’e.

Deputada hosi bankada Governu ne’e ko’alia asuntu ne’e ligadu ho PN iha lejislatura daneen kompozisaun meza domina hosi feto ne’e, promove igualidade jéneru no PN kontinua sai fatin lori aspirasaun feto hodi liberta hosi diskriminasaun oioin.

“Ha’u hakarak kongratula funsionamentu Parlamentu Nasionál nian liu-liu iha meza iha Parlamentu ne’ebé kompostu maiória hosi feto,” nia dehan.

Eis Sekretária Estadu ba Igualidade Jéneru no Inkluzaun ne’e hateten, luta ba igualidade jéneru ne’ebé hahú kedas dezde TL luta ba indepedénsia no nia beiala sira barak ne’ebé tuur hanesan xefe suku no mós ba xefe ba kultura ninian.

“Ita nafatin kontinua luta ida-ne’e hodi to’o ohin loron lejislatura ida-ne’e, bele haree meza Parlamentu domina hosi feto,” nia hateten.

Enkuantu iha lejislatura daneen ne’e, lidera hosi Prezidente Parlamentu Nasionál, Maria Fernanda Lay hosi bankada CNRT, Primeira Vise Prezidente Parlamentu Nasionál, Maria Teresinha Viegas hosi bankada CNRT, Segundu Vise Prezidente Parlamentu Nasionál, Alexandrino Afonso Nunes hosi bankada PD.

Sekretária meza PN, Virginia Ana Belo (CNRT) no primeira Sekretária Meza PN, Maria Teresa da Silva Gusmão (PD) no Segundu Sekretária Meza PN, Bendita Monis Magno (CNRT).

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!