PPN Maria Fernanda Lay sai feto exemplár ba feto Timor-Leste
DILI, 28 juñu 2028 (TATOLI)—Diretora Asisténsia Legál ba Feto no Labarik (ALFeLa), Marcelina Amaral, hateten Prezidente Parlamentu Nasionál (PPN) Maria Fernanda Lay sai feto exemplár no istoria ida ba feto Timor-Leste.
Notísia Relevante: Maria Fernanda Lay sai feto inspiradora ba feto Timor-Leste
“Ami hosi organizasaun ALFeLa hakarak fó ami-nia parabéns no apresiasaun ba ita-nia feto maluk Maria Fernanda Lay ne’ebé primeiravés nomeia sai Prezidente Parlamentu Nasionál, segundu órgaun soberanu nian iha Timor-Leste. Ida-ne’e hatudu ba mundu katak ita feto mós bele kaer pasta importante ne’e. Ida-ne’e sai istória foun ba ita Timor-Leste. Hosi ALFeLa orgullu tebes tanba Timor-Leste mós fó espasu no opurtunidade ba feto hodi lidera segundu órgaun soberanu. Ida-ne’e hanesan ezemplu ida ba feto sira iha vida polítika no sai exemplár no feto sente bele iha kualker pozisaun ne’ebé iha,” nia hateten ba Agência Tatoli iha nia kna’ar fatin, Vila Verde, kuarta ne’e.
Nia dehan, oportuidade sei iha hodi kompete ba eleisaun munisipál tinan oin nune’e hakarak enkoraja feto hotu-hotu iha aldeia no suku sira.
“Ha’u enkoraja ita-boot sira atu kompete eleisaun munisipál tinan oin. Ha’u fiar, ita feto bele kompete iha eleisaun suku tanba feto bele tuur órgaun soberania tanbasá mak xefe suku labele,” nia dehan.
ALFeLa nu’udar organizasaun feto ne’ebé fó asisténsia legál ba feto no labarik sira, prontu kolabora ho mandatu lejislatura daneen ne’e.
Kona-ba advokásia, nia dehan, ALFeLa mós servisu ho organizasaun rede sira hanesan Rede Feto hodi fó apoiu kapasitasaun diretamente.
“Tanba ita iha esperansa boot ba ita-nia feto maluk iha komunidade sei kandidata-an ba eleisaun suku nian tinan oin. Ida-ne’e fó opurtunidade ba feto hodi dezenvolve an kapasidade ba prontu lidera. Maibé oinsá atu prepara feto ne’e, feto ida-idak mak tenke prepara nia an. Ha’u enkoraja katak nível suku ne’e la’ós mane de’it mak tur lae, maibé ita feto mós bele no feto bele duni mak ita-nia feto maluk Maria Fernanda Lay asume pasta Prezidente Parlamentu Nasionál,” Marcelina dehan.
Notísia Relevante: Maria Fernanda Lay feto dahuluk lidera lejislatura daneen
Jornalista : Osória Marques
Editór : Cancio Ximenes
