DILI, 26 juñu 2023 (TATOLI)—Prezidente Konsellu Rede Feto, Zelia Fernandes, hateten prezidente Parlamentu Nasionál, Maria Fernanda Lay, sai nu’udar feto inspiradora no motivadora ba feto hotu-hotu iha Timor-Leste, tanba nia sai feto dahuluk ne’ebé lidera lejislatura daneen.
Notísia Relevante: Maria Fernanda Lay feto dahuluk lidera lejislatura daneen
“Tempu opurtunu tebes no ida-ne’e korajen, inspirasaun, motivasaun ba feto hotu-hotu iha Timor-Leste no tempu ona feto lidera segundu órgaun soberanu iha ita-nia rain. Ida-ne’e hodi hatudu nia servisu ne’ebé kualidade no di’ak ba mundu hanesan órgaun lejisladór, fiskalizadór no foti desizaun ba asuntu ida iha Parlamentu Nasionál,” Zelia Fernandes, hateten ba Agência Tatoli, iha nia kna’ar fatin Obrigado Barack, Matadouro, segunda ne’e.
Nia hateten, Prezidente Parlamentu Nasionál (PPN), Maria Fernanda Lay ne’ebé hetan konfiansa hosi lejislatura daneen hodi lidera Parlamentu Nasionál durante períodu 2023-2028.
“Ida-ne’e hatudu katak feto Timor-Leste la’ós de’it feto potensiál maibé ita feto bele duni. To’o ona tempu, ita feto lidera segundu órgaun soberanu Timor-Leste nian. Ita iha polítika lejislasaun oioin, ne’ebé fó duni espasu ba feto atu feto sai titulár iha órgaun soberania iha rai ida-ne’e,” nia dehan.
Tanba ne’e, Rede Feto nia esperansa katak kompromitidu hosi Prezidente Parlamentu Nasionál, Maria Fernanda Lay katak sei halakon lei pensaun vitalísia ne’ebé fó kontribui ba eis titulár balun ne’ebé la hala’o ona atividade sira.
“Lei pensaun vitalísia ne’ebé sei hatodan Orsamentu Jerál Estadu nian, kontinua injustisa sosiál no diferensa sosiál iha rai-laran. Hosi kompromisiu ne’e kompromitidu tebes atu Prezidente PN Maria Fernanda Lay, hodi halakon ka hamoos pensaun vitalísia ne’e. Ida-ne’e, ba ami sosiedade sívil sira hanesan dejeza tebes no iha esperansa boot hodi realiza saida mak ita-nia Prezidente kompromitidu ona,” nia dehan.
Ho reprezentante feto lidera PN, nia dehan, Rede Feto iha vontade no hanoin atu kontinua rekomenda presiza tau feto iha komisaun sira iha PN.
“Hosi ne’e mós ami iha esperansa boot atu atribui divizaun ba Komisaun sira iha Parlamentu Nasionál, la’ós de’it lidera Komisaun igualdade no jéneru. Tanba bainhira fó tempu feto lidera Komisaun mak oinsá atu integra abordajen integradu jéneru iha sira-nia lejislasaun sira, planu fiskalizasaun no foti desizaun sira,” nia rekomenda.
Aleinde ne’e, nia mós hein katak iha IX Governu ne’e bele envolve no espasu ba feto hodi forma Governu ne’e.
“Espera katak formasaun ba IX Governu ne’e sei partisipa no envolve mós feto iha laran. Tanba buat ne’ebé ita haree katak hosi primeiru Governu mai to’o VIII Governu ita haree partisipasaun feto menus hosi 25%. Fiar no hein katak, iha Governu ida-ne’e bele atinje númeru ne’e ou liu kuota 30%. La’ós de’it aumenta kuota iha Parlamentu Nasionál de’it maibé iha mós IX Governu iha sentrál no mós to’o iha lokál sira,” nia hateten.
Tanba, tuir nia, tinan oin mós sei iha eleisaun suku nian nune’e fó nafatin espasu ba feto hodi bele tuur iha pozisaun xave sira iha lokál.
Notísia Relevante: Maria Fernanda Lay: ’’Pensaun vitalísia bele hamoos laiha buat ida’’
Jornalista : Osória Marques
Editór : Cancio Ximenes
