DILI, 05 jullu 2023 (TATOLI)— Governu liuhosi Autoridade Protesaun Sívil (APC, sigla Portugés) apoia ona nesesidade bázika ba vítima dezastre naturál ne’ebé kauza hosi udan boot ne’ebé akontese iha loron 01 to’o 04 jullu iha Munisípiu Laútem, Manufahi, Covalima, Ainaro no Viqueque.
“Ami nia ekipa tun ona ba terreñu hodi halo identifikasaun hodi fó ona apoia emerjénsia liuliu nesesidade bázika hanesan ai-han ba vitima sira ba dezastre naturál iha munisipiu Laútem, Manufahi, Covalima, Ainaro no Viqueque,” Diretór Gabinete Relasaun Externa Autoridade Protesaun Sívil, Anacleto Caetano, hateten liuhosi konferénsia imprensa iha edifisiu Caicoli, kuarta ne’e.
Notísia relevante: Dezastre naturál estraga uma 21 no estrada iha Lour
Tuir dadus provizóriu udan boot ne’ebé akontese iha inisiu fulan jullu ne’e hamosu inundasaun hodi afeta ba uma komunidade 274 no mota konsege lori estudante na’in ha-at hanesan Agostino Paul Pinto, Elfia de Jesus no Januario Brites, mak konsege salva, maibé Joanico da Costa, mota lori no daudaun ne’e ekipa APC ho autoridade lokál sira sei buka tuir.
Ekipa APC iha munisípiu hirak ne’e konsege evakua ona vítima balun ba sentru akollamentu ne’ebé besik.
“Hanesan iha Manufahi, ami ho autoridade lokál hamutuk parseiru sira evakua vítima sira ba sede suku Dotik no vítima balun konsege evakua ba família nia uma ne’ebé besik”, nia informa. Anacleto Caetano informa.
Notísia relevante: Dadus provizóriu: APC Viqueque identifika uma-kain 750 afetadu inundasaun
APC iha obrigasaun no responsabilidade bo’ot atu fó kedan apoiu emerjénsia iha momentu vitíma sira presiza tanba estoke nesesidade bázika iha armazein sira iha munisípiu sufisiente hela.
Daudaun ne’e, ekipa APC halo hela verifikasaun ba uma komunidade sira ne’ebé hetan afetadu dezastre naturál hodi fó apoia material rekuperasaun.
“Atu hetan rekuperasaun ne’e liuhosi rekezitu balun hanesan haree ba kondisaun estragu kma’an no estragus grave. Uma bee tama de’it sei fó apoia emerjénsia de’it”, nia afirma.
Notísia relevante: Mota lori estudante tolu iha Lautém, ida to’o agora seidauk hetan
Jornalista : Natalino Costa
Editór : Florencio Miranda Ximenes
