DILI, 05 jullu 2023 (TATOLI)–Ministériu Obra Públika (MOP) planeia sei forma ekipa ida hodi halo verifikasaun ba projetu sira ne’ebé Governu anteriór halo ona lansamentu.
“Governu sei haree projetu sira ne’ebé la’o ne’e tuir lei ka lae, iha verifikasaun tuir prosedimentu ka lae, depois ita sei haree, balun ne’ebé la tuir lei, regra, abandona hela ami sei foti asaun, ami sei forma ekipa ida hodi verifika,” Ministru Obra Públika, Samuel Marçal, hateten iha Palásiu Governu, kuarta ne’e.
Notísia relevante : Estrada ligasaun Aileu-vila ba Lequidoe no Remexio hatuur ona fatuk dahuluk
Antes ne’e, Primeiru-Ministru, Xanana Gusmão liuhosi ninia diskursu iha serimónia tomada pose ba membru IX Governu, hateten katak sei hala’o auditoria ba Tribunál konta, Komisaun Antí-Korrupsaun no Ministériu Públiku kona-ba irregularidade barak iha relatóriu anuál kona-ba programa oin-oin no kona-ba falta prosesu konkursu ba projetu barak tebes.
Iha mandatu ikus VIII Governu, konsege lansa projetu iha munisípiu tolu hanesan estrada liga Manatuto vila ba postu administrativu Laclo, estrada liga Aileu (Bekliru) ba postu administrativu ba Lequidoe, Aileu ba Remexiu, no Maliana vila, munisípiu Bobonaro.
Jornalista : Antónia Gusmão
Editora : Julia Chatarina
