DILI, 05 juñu 2023 (TATOLI)–Udan-boot ne’ebé akontese iha loron ikus ne’e rezulta mota lori estudante na’in-tolu iha munisípiu Lautém, ne’ebé na’in-ida to’o agora seidauk hetan.
“Foin lalais iha loron 03 jullu akontese udan-boot loron tomak, rezulta mota lori ita-nia estudante na’in-tolu, kompostu hosi feto rua no mane ida iha Odofuro, postu administrativu Luro nian. Bainhira labarik sira sai hosi eskola Ensinu Báziku Sentrál Odofuro mak mota lori sira, maibé feto na’in-rua konsege salva-an, enkuantu mane ida to’o agora buka seidauk hetan,” Administradór munisípiu Lautém, Domingos Sávio, informa ba Agência Tatoli, via telefónika, kuarta ne’e.
Notísia relevante : Dadus provizóriu: APC Viqueque identifika uma-kain 750 afetadu inundasaun
Daudaun ne’e, ekipa bombeiru ho apoiu hosi Polísia komunitáriu no komunidade lokál sei kontinua buka.
“Labarik na’in-tolu ne’ebé mota lori ne’e, sira hela iha Lereadu, suku Mahina II, postu Administrativu Lautém, bainhira sira bá eskola, sira tenke hakat mota ho ida-ne’e sira fila hosi eskola maizumenus tuku 17:00 lorokraik mak mota lori sira,” Autoridade munisípál konta tuir.
Estudante ne’ebé mota lori no to’o agora seidauk hetan ho naran kompletu Joanico da Costa, ho idade,17, daudaun klase 8° ano.
Jornalista : Arminda Fonseca
Editora : Julia Chatarina
