iklan

NASIONÁL, HEADLINE, INKLUZAUN SOSIÁL

Autoridade Manufahi presiza mákina pezadu hodi normaliza infraestutura a’at kauza dezastre naturál

Autoridade Manufahi presiza mákina pezadu hodi normaliza infraestutura a’at kauza dezastre naturál

Komunidade lokál akompaña hela ponte Aba-tú iha Manufahi ne’ebé kotu totál, hafoin udan-boot no inundasaun iha loron domingu (02/07/2023). Imajen/Espesiál

DILI, 06 jullu 2023 (TATOLI)—Udan-boot to’o akontese inundasaun iha munisípiu Manufahi, iha domingu (02/07) to’o agora, rezulta infraestrutura públika hanesan estrada no ponte a’at inklui komunidade nia uma hetan estragu.

Haree ba situasuan ne’e, Autoridade husu ba parte Governu hodi halo intervensaun lalais tanba situasaun dezastre naturál ne’ebé akontese iha munisípiu ne’e konsideradu grave.

“Ita halo ona intervensaun maibé ami presiza urjentemente apoia mákina pezadu sira hosi nasionál, tanba dalan barak kotu inklui ponte. Daudaun ita-nia empreza lokál Star King mak apoia nia mákina pezadu hodi hasai rai monu ba estrada sira, maibé ida-ne’e seidauk sufisiente,” Administradór munisípiu Manufahi, Arantes Isaac Sarmanto, informa ba Agência Tatoli, via telefónika, kinta ne’e.

Notísia relevante : Governu apoia ona nesesidade bázika ba vítima dezastre naturál

Iha sorin seluk, Autoridade hamutuk ho ekipa taks force halo esforsu hodi monta ponte provizóriu ba ponte Aba-tú ne’ebé kotu totál, nune’e tanba ponte ne’e iha kapitál munisípiu, bainhira kotu difikulta movimentu hotu iha munisípiu Manufahi.

“Ita hamutuk ho funsionáriu Eletricidade de Timor-Leste iha Manufahi no Autoridade Protesaun Sivíl solda ai-rin eletrisidade hodi tau iha ponte Aba-Tú hodi fasilita movimentasaun komunidade,” nia akresenta.

Aleinde ne’e, uma balun iha munisípiu Manufahi hetan estragu kauza dezastre naturál.

“Situasaun ne’ebé akontese iha inísiu jullu to’o agora iha munisípiu Manufahi, postu administrativu Alas, Same, no Fatuberliu, kuaze mota tama ba komunidade nia uma. Dadus provizóriu iha uma-kain 50 resin mak afetadu, maibé ekipa task force sei iha terrenu hodi halo levantamentu dadus ne’ebé bele liu númeru ne’e,” nia relata.

Nune’e mós, iha infraestrutura hanesan estrada, ponte, no irrigasaun iha Manufahi mak hetan estragu maka’as.

“Estrada no ponte sira ne’e barak mak kotu, ne’e kuaze ligasaun hahú Dili-Manufahi inklui munisípiu bá postu administrativu sira. Relasiona ho estrada kotu, provizóriu movimentasaun transporte públiku Manufahi bá Dili paradu tanba dalan kotu iha parte suku Fahi-nehan, postu administrativu Fatuberliu no Lehu Lolo iha parte Ainaro nian,” nia akresenta.

Ekipa hosi Autoridade Protesaun Sivíl hamutuk ho Servisu munisipál Diresaun Dezastre daudaun ne’e kontinua halo verifikasaun iha terrenu no evakua vítima afetadu dezastre naturál ba fatin seguru, nune’e bele fó apoiu umanitáriu, saúde no seluk tan.

“Bainhira akontese situasaun ne’e, ha’u rasik ho ekipa taks force tun kedas halo intervensaun hodi salva ita-nia komunidade hosi inundasaun no halo identifikasaun ba estragu sira ne’ebé iha, maibé daudaun ne’e udan sei kontinua hela, ne’ebé dadus fixu seidauk iha,” Autoridade munisipál dehan.

Administrasaun munisípiu Manufahi daudaun halo koordenasaun ho Ministériu Administrasaun Estatál (MAE), Ministériu Obra Públika (MOP), inklui Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P) atubele hetan ekipamentu pezadu no monta ponte provizóriu balun ba ponte sira ne’ebé kotu atu fasilita movimentasaun komunidade lokál.

Iha sorin seluk IGEADE, I.P daudaun ne’e halo ona levantamentu dadus ba estrada no ponte sira ne’ebé kotu.

“Situasaun infraestrutura ita tenke rezolve lalais, se  lae bele prejudika no sai problema sosiál, liu-liu ema bele halo manipulasaun folin sasán nesesidade bázika iha Manufahi,” nia fó hanoin.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!