DILI, 06 jullu 2023 (TATOLI)–Administradór postu Uatucarbau, munisípiu Viqueque, Alfredo dos Santos, informa, udan-boot no inundasaun foin lalais ne’e halo dalan no ponte liga ba suku no postu kotu, nune’e difikulta movimentu transporte no ema.
“Impaktu udan ne’e halo dalan liga mai postu Uatucarbau daudaun ne’e kotu iha parte Ailembata no dalan área Lia-Oliho liga bá suku Afaloikai ne’e kotu totál, nune’e abitante sira tenke la’o ain maka foin hakat liu. Nune’e mós, ponte hosi Metauai iha área Vessoru kotu, ne’ebé horiseik ami ho inisiativa rasik aterru fali rai maibé orsida bainhira udan ne’e tun, mota sei lori fali rai ne’ebé ami aterru tanba ami la uza ekipamentu pezadu ruma ba aterru,” Autoridade munisipál hateten ba Agência Tatoli, via telefónika, kinta ne’e.
Notísia relevante : Dadus provizóriu: APC Viqueque identifika uma-kain 750 afetadu inundasaun
Tuir Administradór, dalan kotu sai difikuldade tanba transporte no abitante lokál labele halo movimentu bá munisípiu Viqueque.
“Ha’u hanoin Governu sira presiza tau-atensaun hodi normaliza dalan sira liga bá postu Uatucarbau, tanba agora transporte públiku hanesan anguna labele halo ninia movimentu no difikulta abitante sira-ne’ebé atu halo viajen bá munisípiu no hosi munisípiu mai postu. Ohin, ha’u rona dehan ekipa Ministériu Obra Públika (MOP) orsida maka foin tun ba terrenu hodi halo levantamentu dadus ba dalan no ponte sira-ne’ebé kotu,” nia akresenta.
Iha fatin ketak, Diretór Servisu Obra Públika munisípiu Viqueque, Mário do Rego, relata, ekipa téknika sira daudaun identifika ona katak parte Lugatohi rai monu beibeik, enkuantu ponte hosi suku Uma-tolu, postu Lacluta kotu totál inklui Uelolo no iha postu seluk, nune’e ekipa daudaun kontinua halo identifikasaun hodi rekolla dadus no relata ba MOP.
“Ha’u relata ona ba ministériu kona-ba relatóriu provizóriu dalan no ponte sira kotu iha munisípiu Viqueque ne’ebé hetan estragu hosi udan-boot no inundasaun iha loron 04 jullu kalan. Ita hein bainhira maka ekipa sira tun hodi halo intervensaun hodi normaliza dalan sira ne’ebé hetan estragu,” nia tenik.
Jornalista : Vitorino Lopes da Costa
Editora : Julia Chatarina
