DILI, 06 jullu 2023 (TATOLI) – Udan no anin boot ne’ebé akontese foin lalais ne’e danifika Eskola Bázika Filiál (EBF) N.u 01 Lebuana no Maumeta, iha munisípiu Liquiçá.
Diretór Servisu Edukasaun Munisípiu Liquiçá, Carlos Lopes, hatete kondisaun eskola rua ne’e ida rai taka metin no ida seluk anin sobu. Akontesimentu iha loron 30 juñu no 01 jullu.
“Ita iha eskola rua mak hetan problema, ida husi Eskola EBF N.u 01 Lebuana iha suku Lukulai, Postu administrativu Liquiçá Vila. Husi akontesimentu ne’e halo estudante hamutuk 175 to’o agora labele tuir prosesu aprendizajen hanesan baibain no estudante sira ne’e tenke hela iha uma hodi hein intervensaun husi Governu atu neutraliza situasaun iha eskola”, Carlos Lopes informa asuntu ne’e ba Tatoli via telefone.
Aleinde ne’e, iha EBF Maumeta iha postu administrativu Bazartete maski edifísiu ne’e ninia kondisaun grave totál, maibé dirijente eskola sira nafatin iha inisiativa hodi realiza prosesu aprendizajen ba estudante 180 iha li’ur de’it, tanba lakohi atu prejudika alunu sira tanba ezame segundu periodu besik ona.
Haree ba kondisaun EBF rua ne’e, diretór servisu edukasaun haruka ona karta urjente ba Ministra Edukasaun atu ele foti desizaun ruma hodi tempu besik bele halo intervensaun ba eskola rua ne’e atu estudante sira bele tuir prosesu aprendizajen ho di’ak.
“Ohin ha’u haruka kedan karta urjente ba Ministra Edukasaun atu nia bele haree hodi foti desizaun ruma no bainhira maka atu iha desizaun ne’e kompeténsia ministra nian”, realsa.
Notísia relevante: Ai tohar danifika edifísiu EBF Katólika Seloi
Jornalista: Tomé Amado
Editora: Maria Auxiliadora
