OMS kolabora ho PN promove lei kontrolu tabaku

DILI, 06 jullu 2023 (TATOLI)—Reprezentante Organizasaun Mundial Saude (OMS) iha Timor-Leste, Arvind Mathur, hasoru malu ho Prezidente Parlamentu Nasional (PN), Maria Fernanda Lay, hodi diskute kona-ba kriasaun lei ida-ne’ebé relasiona ho promosaun saúde públiku liu-liu kona-ba lei kontrolu tabaku nian.
Notísia Relevante: OMS husu MS mantein hasa’e koñesimentu populasaun ba risku tabaku
“OMS iha kompromisu atu kontinua servisu hamutuk ho Governu Timor-Leste no Parlamentu atu kria lei ida kona-ba promosaun saúde públiku nian, liuliu kona-ba kontrolu no supresaun ba forma hotu-hotu hosi komérsiu ilisitu tabaku nian,” Arvind Mathur hateteb ba Agência Tatoli, hafoin konklui sorumutu ho PPN, Maria Fernanda Lay, iha Parlamentu Nasional, kinta ne’e.
Nia hatutan, Organizasaun Mundiál Saúde (OMS) sei fó apoiu ba Parlamentu Nasionál Timor-Leste iha kriasaun lei kona-ba konsumu tua-uvas ne’ebé la saudável.
Aleinde ne’e, OMS hakarak mós kolabora ho órgaun soberanu ida-ne’e hodi diskute polítika inkluzaun ne’ebé kontribui atu garante katak ema ho defisiénsia sira iha asesu ba servisu saúde nian.
Tuir Arvind Mathur, OMS mós iha kompromisu atu servisu hamutuk ho PN no Governu iha elaborasaun lei saúde mentál.
Nia hateten, deputadu sira hala’o papél importante iha implementasaun no supervizaun ba programa saúde sira iha nasaun ne’e.
“Timor-Leste, iha nivel lejizlativu, nu’udar líder rejionál ida iha ezemplu lei sira kona-ba promosaun saúde no, liuliu relasiona ho medida sira ne’ebé koko atu limita konsumu tabaku no promove ezersísiu fíziku. Komisaun Europeia sei servisu hamutuk ho deputadu sira no Prezidente Parlamentu atu promove moris saudavel, nune’e mós atu halo esbosu lei sira-ne’ebé promove moris saudável ba ema,” nia hateten.
Prezidente Parlamentu Nasionál (PN), Maria Fernanda Lay, hateten bainhira ko’alia kona-ba valór hodi promove ezersísiu fíziku no toman saudável sira iha ámbitu hahán no dieta, no mós importánsia hosi ezaminasaun regulár saúde nian.
Notísia Relevante: Ema Seidauk Koñese Lei Kontrolu Tabaku
Jornalista : Osória Marques
EDitór : Cancio Ximenes

