Pagamentu idozu-invalidéz 95.000 sei hein orientasaun hosi ministra foun
DILI, 06 jullu 2023 (TATOLI)–Prezidente Institutu Nasionál Seguransa Sosiál (INSS), Longuinhos Armando Leite, hateten pagamentu idozu no invalidéz hamutuk 95.000 iha faze dahuluk sei hein orientasaun hosi Ministra Solidariedade Sosiál no Inkluzaun (MSSI), Verónica das Dores.
Notísia Relevante: PR promulga alterasaun dekretu-lei subsídiu apoiu ba idozu no invalidéz
“Ba idozu no invalidéz ne’ebé atu simu osan ne’e kuaze 95.000, ida-ne’e sei hein orientasaun hosi ministra foun, hafoin bele paga tanba buat ita tenke la’o tuir regra. Ami atu halo pagamentu maibé ita tenke rona lai orientasaun hosi ita-nia ministra, entaun seidauk bele realiaza. Maibé, kona-ba dadus, orsamentu, ami relata hotu ona ba ministra foun no ami prepardu ona hein de’it oriesntasaun,” Longuinhos Armando Leite hateten ba Agência Tatoli liuhosi telefónika, kuarta ne’e.
Prezidente INSS ne’e hateten, hosi benefisiáiru 95.000 iha territóriu nasionál ne’e sei gasta osarsamentu kuaze millaun $5,4.
Antes ne’e, Governu aprova no dekreta ona dekretu-lei númeru 53/2022, ne’ebé Prezidente Repúblika promulga ona iha 20 jullu 2022, katak subsídiu idozu no invalidéz nian sei sai hosi $50 ba $57.
“Entaun, fulan neen ita-nia inan-aman sei simu $342 no tinan ida sei simu $684,” eis Vise MSSI, Signi Verdial hateten.
Lista idozu no invalidéz ba tinan 2022 iha faze dahuluk, benefisiáriu hamutuk 103.108 ho nia osan millaun $62 no faze daruak iha 93.000-resin ho nia osan millaun $4.65.
Notísia Relevante: Subsídiu idozu- invalidéz nian sei sa’e hosi $50 ba $57
Jornalista : Osória Marques
Editór : Cancio Ximenes
