DILI, 07 jullu 2023 (TATOLI)—Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P) husu ba públiku provizóriamente labele konsumu foos ho marka Manu Vitoria.
“Husu ba operadór ekonómiku sira hotu iha territóriu laran labele fa’an ka komersializa produtu foos ho marka Manu Vitoria ba públiku. Ita mós husu ba konsumidór sira hotu iha territóriu Timor laran tomak, provizóriu labele sosa lai foos ho marka Manu Vitoria ho razaun tanba ita deskonfia produtu ne’e kualidade ladi’ak ka estragadu, tanba ne’e daudaun sei iha prosesu investigasan nia-laran,” Inspetór Jerál AIFAESA, I.P, Ernesto Monteiro, alerta ba públiku liuhosi konferénsia imprensa ne’ebé hala’o iha edifísiu AIFAESA, I.P, Matadouro, sesta ne’e.
Ba kestaun ne’e, AIFAESA, I.P rekolla ona amostra hosi produtu ne’e no sei halo analiza ka teste laboratóriu.
“Bainhira rezultadu analiza iha ona, maka ami ho entidade relevante sira sei fó sai hikas ba públiku kona-ba rezultadu no autoriza ka lae produtu ne’e sirkula iha merkadu Timor-Leste,” nia akresenta.
Notísia relevante : Folin foos no manu-tolun hahú sa’e
Iha fatin hanesan, Diretór Diresaun Nasionál Reguladór Presu, Bertinetti Viera Lobo, hateten, presu sasán, liu-liu foos iha trimestre dahuluk tinan ne’e sa’e tanba mudansa tarifáriu iha pontu entrada.
“Saida mak ami observa iha terrenu katak foos ninia folin sa’e kauza hosi kustu tarifáriu hosi Portu Tibar sa’e no fatór seluk tanba produsaun foos iha Índia menus, entaun nia efetu halo folin sa’e. Ida-ne’e tuir ami-nia identifikasaun ba distribuitór rua iha Dili,” nia dehan.
Jornalista : Arminda Fonseca
Editora : Julia Chatarina
