DILI, 07 jullu 2023 (TATOLI)—Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P) halo inspesaun iha terrenu no identifika empreza distribuidora, Perissos falun produtu foos a’at ba saku ho marka Globus.
“Daudaun ne’e, AIFAESA, I.P mós prosesa ona ba empreza Perissos tanba halo ona repacking ka falun filafali produtu foos ho marka Folsom ne’ebé estragu ka ho kondisaun a’at iha saku ho marka Globus ho kuantidade hamutuk 440,” Inspetór Jerál AIFAESA, I.P, Ernesto Moneiro, hateten liuhosi konferénsia imprensa, ne’ebé hala’o iha salaun enkontru, Matadoru, sesta ne’e.
Notísia relevante : AIFAESA, I.P husu públiku provizóriamente labele konsumu foos marka Manu Vitoria
Iha loron 06 jullu, ekipa operasionál brigada ne’ebé lidera hosi Sub-Inspetór Jerál AIFAESA, Dionísio Neto da Silva, akompaña hosi Diretór Operasaun no Xefe Seksaun Metrolojia, hamutuk ho Inspetór sira halo inspesaun no kontrolu másimu ba loja no distribuitór Perissos no deskobre komete irregularidade hanesan halo falsifikasaun ba foos ho marka Folsom 20kg, ne’ebé ho kualidade ladi’ak hodi subtitui fali ba karon ho marka Globus.
Iha biban ne’e, ekipa halo kedas auto selajem ba produtu hamutuk karon 373 ho marka Globus no Folsom hamutuk karon 67 no halo prosesu kontraordenasaun hasoru estabelesimentu Perissos.
Jornalista : Arminda Fonseca
Editora : Julia Chatarina
