Autoridade Covalima sei halo levantamentu dadus ba vítima dezastre naturál
COVALIMA, 07 jullu 2023 (TATOLI)—Autoridade Covalima liuhosi Servisu Munisipál Protesaun Sivil Jestasaun Risku Dezastre Naturál sei halo lavantamentu dadus ba vítima dezastre natural ne’ebé akontese iha Covalima.
“Ita sei halo lavantamentu dadus ba komunidade ne’ebé sai vitima ba dezastre naturál iha munisipiu Covalima,” Diretór Servisu Munisipál Protesaun Sivil Jestasaun Risku Dezastre Naturál Covalima, Quintino da Costa, hateten ba Agência Tatoli, iha postu Zumalai, sesta ne’e.
Udan boot ne’ebé akontese iha loron 3-4 fulan-jullu tinan 2023 ne’e, la’ós komunidade suku Zulo, postu Administrativu Zumalai de’it mak afetadu ba dazastre naturál, maibé akontese mós iha postu sira seluk, nune’e presiza halo levantamentu dadus.
Presiza halo lavantamentu dadus tanba daudaun ne’e vítima dezastre naturál ho tipu erosaun iha suku Zulo, postu Zumalai ne’e foin hetan apoiu emerjénsia maibé postu administrative sira seluk seidauk bele simu.
Komunidade postu Zumalai ne’ebé afetadu de’ it ba ba dezastre naturál, maibé komunidade iha postu administrativu sira seluk mós afetadu hotu ba dezastre natural ne’e.
Durante udan boot postu administrativu ne’ebé afetadu ba inundasaun mak hanesan postu Tilomar, postu Suai postu Maucatar no postu Zumalai ne’ebé hetan ona apoiu emerjénsia balunb.
Tuir dadus, vítima dezastre naturál hosi suku Zulo, postu Zumalai, hosi aldeia Lale, Obukmil no Leogol ne’e hamutuk xefe família hamutuk 162, no hosi númeru ne’e uma 54 mak kategória aat totál
Jornalista : Celestina Teles
Editor : Cancio Ximenes
