DILI, 07 jullu 2023 (TATOLI)—Igreja Protestante Timor-Leste (IPTL), sesta ne’e, halo doasaun ran hodi komemora aniversáriu ezisténsia ba dala-35 (09/07/1988 – 09/07/2023) iha Timor-Leste.
Prezidente IPTL, Pastór Domingos Alves, hateten, sarani IPTL ohin halo doasaun ran, ne’ebé hanesan atividade rutina kada tinan no sempre konvida médiku sira hosi Hospital Nacional Guido Valadares (HNGV) hodi halo doasaun ran molok komemora aniversáriu.
“Atividade doasaun ran ne’ebé realiza ohin ne’e kada tinan ita sempre halo hodi kontribui ami-nia ran turuk ida tulun ema seluk, bazeia ba ita-nia tema iha tinan ne’e dehan: ‘Muda-an ba hodi hafoun imi-nia neon’, ho sub-tema ‘Ho espíritu aniversáriu ita hametin fraternidade umana hodi lori transformasaun ba sarani no komunidade,” Pastór Domingos Alves, informa ba Agência Tatoli, iha Igreja Hosana, Bebora.
IPTL halo atividade tolu molok komemora aniversáriu, hanesan horiseik (06/07) halo ona atividadae semináriu loron tomak ho tópiku kona-ba fraternidade umana, ohin kontinua dosaun ran no ikus mak sei halo avaliasaun anuál.
“Ami kada tinan halo atividade avaliasaun, nune’e saida mak ami halo ona iha tinan kotuk no saida mak prepara ba tinan oin inklui atividade ikus sei halo iha loron domingu (09/07), inklui halo ordenasaun ba Pastór foun na’in-tolu atu kompleta no haforsa misaun ba oin,” nia akresenta.
Notísia relevante : GASC no autoridade lokál inaugura igreja Betesda Naedala iha Viqueque
Durante ezisténsia, atividade importante ne’ebé hala’o mak espirituál hanesan omília, edukasaun, vizita pastorál no seluk tan.
“Maibé atividade ida-ne’e ami la la’o mesak, sempre hamutuk ho Governu Timor-Leste liuhosi Servisu Apoiu Sosiedade Sivíl no Autoridade Sosiál iha Gabinete Primeiru-Ministru (SASCAS-PM), ne’ebé iha tinan kotuk apoiu ami fundu $15.000 hodi hasa’e ami-nia koñesimentu iha parte administrasaun, lideransa no seluk tan,” Pastór ne’e esplika.
Ba tinan ne’e, IPTL propoin tan programa iha área ekonomia sustentável, eskola, klínika no misaun igreja nian. Aleinde ne’e, membru sira iha esperansa bele hetan tan apoiu fundu hosi Governu.
“Bainhira Governu fó osan iha tinan ne’e, kuantidade hira de’it ami simu hodi kontinua programa sira ne’ebé iha, liu-liu tulun sarani sira hakabesik-an ba Maromak no sarani sira mós bele fó kontribuisaun ba rai ida-ne’e liuhosi saida mak sira bele halo,” Pastór Domingos Alves otimista.
Daudaun ne’e IPTL iha membru hamutuk 2.000 resin iha Timor-Leste.
Jornalista : Arminda Fonseca
Editora : Julia Chatarina
