ME husu edukasaun munisipál relata dadus eskola afetada ba dezastre naturál
DILI, 07 jullu 2023 (TATOLI) – Ministériu Edukasaun (ME) husu ba dirijente edukasaun munipál sira atu relata lalais dadus eskola ne’ebé afetada ba dezastre naturál, nune’e bele hetan atendimentu urejente.
Diretór Nasionál Asaun Sosiál Eskolár, Joaquim Martins, informa iha armazein ministériu iha materiál emerjénsia sufisiente atubele responde ba eskola sira ne’ebé maka afetada ba dezastre naturál.
“Ita-nian materiál sufisiente atu responde dezastre naturál, ne’ebé maka akontese ba eskola sira iha territóriu”, Joaquim Martins reiteira iha Vila Verde, ohin.
Materiál emerjénsia ho kuantidade 3.232 ne’ebé iha armazein ME nian ne’e mak kalén 1.220, ai kuadradu 6×12 iha kúbiku 500-resin, kalén lizu iha metru 37, lona iha tahan 113, tanke bee iha 79, pregu xapeu iha grama 255 grama, pregu séntimu 12 iha kilograma 230, pregu séntimu 15 kilograma 230 no pregu séntimu 10 kilograma 230.
Ministériu kontinua halo kooperasaun ho parseiru sira husi Plan Internasionál inklui UNICEF hodi apoia mós materiál emerjénsia sira atu hakmaan difikuldade sira ne’ebé diresaun hasoru.
Diresaun mós iha dadus eskola sira ne’ebé hetan dezastre naturál hahú iha loron 02 fevereiru to’o 16 marsu ne’ebé hetan ona apoiu materiál hamutuk 23. Eskola sira ne’e iha Ainaro haat, Ermera tolu, Covalima lima, Viqueque hitu, Lautém rua, Aileu no Dili ida ba kada.
Husi eskola 23 ne’e hetan ona apoiu materiál emerjénsia ho kuantidades 3.369 – kalén unidade 1.696, ai 5×10 640, ai 6×12 475, kalén lizu metru 380, lona tahan 70, tanke bee 21 no pregu séntimu 7 to’o 12 iha kilograma 87.
Notísia relevante: Dezastre naturál danifika eskola rua iha Liquiçá
Jornalista: Tomé Amado
Editora: Maria Auxiliadora
