DILI, 07 jullu 2023 (TATOLI)–Ministra Negósiu Estranjeiru Austrália, Penny Wong hasoru malu ho Primeiru-Ministru, Kayrala Xanana Gusmão, hodi hato’o felisitasaun no reafirma kooperasaun bilaterál.
Ministra Penny Wong hateten, hasoru malu ho Xanana Gusmão hodi ko’alia kona-ba interese Estadu.
“Ami hasoru malu dala-barak ona, nia (Xanana) ema ne’ebé di’ak no sempre ko’alia ba interese Timor-Leste nian. Ha’u hato’o ona vontade hosi Austrália hodi hamutuk ho Governu foun realiza futuru Timor-Leste nian,” Penny Wong hateten hafoin hasoru malu ho Xanana Gusmão iha Gabinete Fronteira Marítima, Palásiu Governu, sesta ne’e.
Notísia relevante : PR Horta-Penny Wong diskute kooperasaun TL no Austrália
Ministra australiana ne’e afirma, Austrália iha kompromisu servisu hamutuk ho Governu Timor-Leste hodi kontinua apoia dezenvolvimentu ekonomia.
Biban hanesan, Primeiru-Ministru Xanana Gusmão, hateten, Ministra Penny Wong nu’udar belun di’ak Timor.
“Ami hasoru malu dala barak ona, Ministra ne’e amiga ida di’ak tebtebes ba ita-nia rain. Ami ko’alia nível a’as de’it tanba Governu daudaun diskute hela programa no atu lori ba Parlamentu aprova tiha maka foin bele diskute,” nia akresenta.
Xefe Governu dehan, bainhira programa IX Governu nian aprova ona, maka kada setór bele hahú kontaktu ona Austrália ba apoia sira.
“Ministra Penny Wong dehan sei fó ba ita-nia dezenvolvimentu iha saida de’it mak ita presiza,” nia tenik.
Enkontru ne’e akompaña mós hosi Enkarregadu Negósiu Departamentu Negósiu Estranjeiru Austrália (DFAT, sigla ingles), Caitlin Wilson, Ministru Negósiu Estranjeiru no Kooperasaun, Bendito Freitas, Embaixadora Timor-Leste iha Austrália Inês Almeida, inklui entidade relevante seluk.
Jornalista : Antónia Gusmão
Editora : Julia Chatarina
