COVALIMA, 07 jullu 2023 (TATOLI)—Xefe Servisu Emerjénsia Médika (SEM) Munisípiu Covalima, Vitorino Sequeira Magno, hamutuk ho nia ekipa liu-liu pesoál saúde sira fó apoiu hala’o tratamentu saúde ba vítima dezastre naturál iha postu administrative Zumalai, munisípiu Covalima.
Notísia Relevante: Saúde Covalima apoia inan isin-rua vítima dezastre narurál iha Zulo
“Ami mai hala’o konsulta jerál ba vítima dezastre naturál hahú kedas akontese dezastre naturál, hanesan iha suku Tashilin ho Raimea no suku Zulo, iha postu administrativu Zumalai, munisípiu Covalima,” Vitorino Sequeira Magno hateten ba Agência Tatoli iha suku Zulo, sesta ne’e.
Durante akontese dezastre naturál iha Covalima, iha loron 6 fulan-jullu tinan 2023 ekipa halo kedas konsulta jerál ba vítima dezastre iha suku Tashilin no Raimea ne’ebé rejista moras Infesaun Respiratóriu Aguda (IRA) aas.
Ekipa SEM hala’o konsulta jerál iha suku Tashilin no Raimea, postu Zumalai ne’e fó prióridade ba inan isin-rua ne’ebé rejista na’in-tolu (3) no labarik na’in-neen (6).
“Ami hala’o konsulta jerál ami rejista moras Infesaun Respiratóriu Aguda (IRA) mak aas liu, tuir isin katar, ulun moras lahó tensaun maibé balun ho tensaun,” nia dehan.
Hafoin finaliza hala’o konsulta jerál ba vítima dezastre naturál iha suku Tashilin no Raimea postu Zumalai iha loron 7 fulan-jullu 2023, ekipa ne’e kontinua hala’o konsulta jerál ba vítima dezastre naturál iha suku Zulo.
“Ohin, ami halo konsulta jerál ba vítima dezastre ho tipu rai halai iha suku Zulo, ami rejista pasiente moras tensaun aas, tee-been, asam urat no ba labarik sira maiória moras tee-been no inus been no IRA,” nia dehan.
Tuir dadus, ekipa SEM hala’o konsulta jerál iha loron 6 fulan-jullu ne’e hamutuk na’in-59 no hosi númeru ne’e labarik na’in-19 mak moras IRA, inus been ho mear no mós balun isin manas, ema boot sira ulun moras no tensaun.
Iha loron 7 fulan-jullu tinan 2023, ekipa hala’o konsulta jerál ba vítima dezastre iha suku Zulo rejista pasiente hamutuk na’in-51
Jornalista : Celestina Teles
Editór : Cancio Ximenes
