COVALIMA, 07 jullu 2023 (TATOLI)—Servisu Saúde Munisípiu Covalima fó apoiu pakote maternidade ba inan isin-rua no inan fo susu ba bebé ne’ebé vítima ba dezastre naturál ho tipu erosaun iha suku Zulo, postu Zumalai, munisipiu Covalima.
“Ami-nia prezensa iha ne’e atu fó apoiu ba inan isin-rua no inan fó susu bebé ne’ebé sai vítima ba dezastre naturál ne’ebé ho tipu erozaun iha suku Zulo,” Diretora Servisu Saúde Covalima, Maria de Fátima Moniz, hatetetn liuhosi nia diskursu molok entrega apoiu pakote martenidade iha suku Zulo, sesta ne’e.
Servisu saúde Covalima fó apoia pakote maternidade ne’e mai hosi agência internasionál UNFPA ne’ebé foku fó apoiu ba inan isin-rua ne’ebé sai vítima ba dezastre naturál ho tipu erosaun ne’e.
Ho nune’e, nia dehan, pakote martenidade ne’ebé fó apoiu ba inan isin-rua sira ne’e hanesan nesesidade bázika sira atu uza durante loron ida ka rua nian.
“Ohin dadeer, Agência Internasionál UNFPA haruka mai ami distribui diretamente ba feto maluk sira uza pakote martenidade ho di’mak maske buat balun ladun kompletu. Maibé, ami fiar bele reponde nesesidade báziku oinsá bele uza loron ida ka rua,” nia dehan.
Tuir dadus, inan isin-rua no inan fó susu bebé ne’ebé simu pakote maternidade hanesan inan isin-rua hamutuk na’in-lima (5) no inan fó susu ba bebé hamutuk na’in-33
Jornalista : Celestina Teles
Editór : Cancio Ximenes
