COVALIMA, 08 jullu 2023 (TATOLI)—Governu liuhosi Sekretáriu Estadu Protesaun Sivil, Mariano Reis, akompañadu hosi Administradór Munisípiu Covalima, Francisco de Andrade, sesta ne’e, entrega apoiu emerjénsia ba vítima dezastre naturál iha Zulo, postu Zumalai, munisípiu Covalima.
Notísia Relevante: Pesoál saúde hala’o tratamentun saúde ba vítima dezastre natural iha Zumalai
“Ha’u-nia servisu asegura populasaun hotu halo evakuasaun ba fatin ne’ebé seguru, fó ajuda umanitáriu emejénsia hanesan ai-han no la’ós ai-han ba vítima sira,” Mariano Reis hateten ba Agência Tatoli iha suku Zulo, postu Zumalai.
Governante ne’e hateten, fó apoiu emerjénsia la’ós ai-han mak hanesan terpal, bíti, bikan, sanan balde no seluk tan no apoiu emerjénsia ai-han mak hanesan foos, mina goreng, masin, susu-been sardina no seluk tan.
“Ha’u la lori buat ida ba ita-boot sira maibé lori IV Governu Konstitusionál ne’ebé lideradu hosi Primeiru-Ministru Kay Rala Xanana Gusmão hato’o solidariedade ba vítima dezastre naturál,” nia dehan.
Xefe suku Zulo, João Lopes de Carvalho, hateten vítima sira-ne’e hetan ona apoiu emejénsia husi autoridade Covalima no hosi parseiru sira, maibé sorte akontese dazstre naturál rai halai iha tempu loron, se dezastre ne’e mosu iha tempu kalan karik sei rezulta vítima barak
Lideransa Komunitária ne’e hato’o agradesimentu maske akontese dezastre naturál ho tipu erosaun ne’ebé lori uma kain 54 mak tama iha kategória grave no uma restu ne’e hetan ameasadu hosi dezastre naturál.
Vítima dezastre naturál iha suku Zulo ne’e hamutuk xefe família 162, no husi númeru ne’e iha uma kain 54 mak tama iha kategória aat total ho populasaun hamutuk 552.
Vítima dezastre naturál ho tipu erosaun iha suku Zulo ne’e, hetan apoiu emerjénsia hosi parte ekipa Servisu Emerjénsia Médika (SEM) Covalima hala’o tratamentu jerál ba vítima sira.
Notísia Relevante: Governu observa direta fatin akontesimentu dezastre naturál iha Zulo
Jornalista : Celestina Teles
Editór : Cancio Ximenes
