DILI, 09 jullu 2023 (TATOLI)—Empreza distribuidora, Perissos Lda lamenta no konsidera Autoridade Inspesaun no Fiskalizasaun, Atividade Ekonómika Sanitária no Alimentár, Institutu Públiku (AIFAESA, I.P) halo defamasaun ba marka no seidauk halo teste ruma ba amostra foos ho marka Manu Vitoria hodi deklara laiha kualidade.
“Ami kondena tanba akuzasaun ne’e laiha prova. Dalan AIFAESA, I.P nian laiha teste laboratóriu mak klarifika nia asaun sira no laiha dadus faktuál ida atu justifika sira-nia akuzasaun, tanba la fó dadus hosi espertu sira seluk, hanesan nutrisionista ka doutór sira. Importante atu hatene katak AIFAESA, I.P laiha kompeténsia iha área avaliasaun kualidade foos ka produtu ruma ne’ebé relasiona ho alimentasaun,” refere nota hosi Perissos ne’ebé Agência Tatoli asesu, domingu ne’e.
Iha loron 07 jullu, Inspetór Jerál AIFAESA, I.P, Ernesto Monteiro, hamutuk ho ninia ekipa halo konferénsia imprensa hodi husu públiku provizóriamente labele konsumu foos ho marka Manu Vitoria ho razaun tanba deskonfia produtu ne’e kualidade ladi’ak ka estragadu, tanba ne’e daudaun sei iha prosesu investigasan nia-laran.
Ba kestaun ne’e, AIFAESA, I.P rekolla ona amostra produtu ne’e no sei halo analiza ka teste laboratóriu.
Notísia relevante : AIFAESA, I.P husu públiku provizóriamente labele konsumu foos marka Manu Vitoria
Nune’e, empreza Perissos kompromete fornese produtu ho kualidade di’ak ba família Timor-Leste tomak.
“Perissos Vitoria Lda ho tinan 20 ona iha esperiénsia importasaun no distribuisaun foos di’ak ba Timor-Leste nia ema barak no kontribui ba seguransa alimentár iha Timor Leste. Ami hakarak enfatiza katak foos ne’ebé Perissos Vitoria Lda importa hosi fornesedór internasionál estabelesidu iha Índia, ne’ebé hanesan fornesedór boot foos iha mundu. Ami garante katak prosesu importasaun foos ho rigorozu tebes, tanba mai hamutuk ho dokumentu kompletu inklui sertifikadu analiza, sertifikadu fitosanitáriu, sertifikadu fumigasaun, sertifikadu orijen, no sertifikadu inspesaun,” nota hosi Perissos esplika.
Ho baze dokumentu komprovativu sira maka empreza distribuidora ne’e garante produtu importasaun hosi Índia ho kualidade di’ak.
Aleinde ne’e, ekipa responsável Perissos halo teste rigorozu ba foos Manu Vitoria durante fulan-tolu resin molok halo importasaun, nune’e bele garante kualidade no seguransa produtu inklui halo teste no konsumu foos própriu atu garante produtu ne’e di’ak ba ema hotu molok fornese ba kliente sira.
Tanba ne’e, Perissos konsidera deklarasaun ne’ebé fó sai hosi AIFAESA laiha fundamentu no halo danu boot ba Perissos nia marka.
“Husu ba AIFAESA, I.P atu emite pedidu deskulpa ba públiku no Perissos Vitoria, Lda no retrata deklarasaun difamatóriu. Husu ba AIFAESA, I.P atu labele halo tan komentáriu difamatóriu kona-ba Perissos nia marka ka atividade negósiu sira. Bainhira la kumpre pedidu ne’e iha prazu 48 oras nia laran, maka Perissos sei prosesa AIFAESA, I.P iha Tribunál relasiona ho reputasaun no buka desizaun justu kona-ba prejuízu ba negósiu,” Perissos reforsa.
Biban ne’e, empreza distribuidora ne’e kompromete atu fó produtu di’ak ba kliente no públiku inklui mantein integridade ba marka Manu Vitoria.
“Ami agradese ba konfiansa no lealdade ne’ebé ita boot hotu fó ba ami iha tinan barak nia laran. Ami-nia promesa maka kontinua dedikasaun atu fó satizfasaun ba ita-boot sira,” Perissos fó sai liuhosi kota komunikadu.
Jornalista : Arminda Fonseca
Editora : Julia Chatarina
