iklan

OPINIAUN

Haforsa ‘Farmers First Development’, hodi aselera prosesu tranformasaun Agrikultura Subsisténsia ba Agrikultura moderna iha Timor-Leste

Haforsa ‘Farmers First Development’, hodi aselera prosesu tranformasaun Agrikultura Subsisténsia ba Agrikultura moderna iha Timor-Leste

Hakerek husi: Quintiliano Afonso Belo

Esforsu Estadu Timor-Leste hodi expande dezenvolvimentu ba to’o iha área rurál, tanba hakarak dezenvolve agrikultór no apoiu tranzisaun agrikultura subsisténsia ba agrikultura emprezariál atu hetan transformasaun sosiál totál no kompletu. Maibé infelizmente dezenvolvimentu seitór agrikultura ne’ebé la’o daudaun iha Timor-Leste, ladauk konsege lori transformasaun sosiál ba agrikultór sira maske seitór agrikultura forma husi uma-kain hamutuk 1444 mill itál husi totál uma-kain 300 itál mill iha Timor-Leste. (Sensu Agrícola 2021).

Husi dadus refere, tuir hau nia hanoin resultadu dezenvolvimentu seitór agrikultura presiza haforza no aselera liu tan potensialidade rekursu lokál hodi akomoda problema fundamental ne’ebé tuir James Scott temi nanis ona katak, agrikultór iha area rurál nu’udar komunidade “pra-kapitalista” ho prinsipius rasionalidade sosial ne’ebé metin no forti. Sira komunga forza kolektivismu duke halo kompetisaun no utiliza prinsipiu ekonomia moral nu’udar fundasaun duke ekonomia rasiosinu. Sira kaer metin filosofia risk minimization no safety first (agrikultór subsistensia, la iha rai ne’ebé luan atu halo atividade agrikultura, la iha orientasaun ba merkadu ka produs la’os buka rendimentu ekonómiku) simples karik ‘kuda ohin para hodi bele han iha aban’.

Iha sira nia kakutak nu’udar agrikultór hanesan mos dalan atu moris laos atu buka rendimentu ekonomia uma laran ho lukru ne’ebé bot. Sira fiar metin halao atividade agrikultura nu’udar tradisaun sosial ne’ebé bele lori moris diak ba sira nia-an rasik no ba sira nia sosiedade. Sira iha forza koletivismu no potensia rekursu sufisiente atu tulun malu no até iha kapasidade atu fahe rekursu ba malu maske mukit hela (shared poverty). Sira dezenvolve-an ho filosofia moris ne’ebé organiku até han deit aifarina, batar no hudi ba sira bai-bain ona.

 

Esplikasaun problema fundamental sira iha leten, labale hare deit ho matan sorin no labele hare hanesan obstaklu iha dezenvolvimentu seitór agrikultura, maibe konsidera hanesan potensilidade no forza rekursu lokál atu atinji sasukat objetivu iha kontekstu dezenvolvimentu seitór agrikultura.

 

Hahú ho porsesu elaborasaun politika ba dezenvolvimentu seitór agrikultura liu husi explorasaun ida ne’ebé klean no beibeik molok atu dezenvolve seitór agrikultura iha area rurál. Eradika politika dezenvolvimentu agrikultura ho deit intesaun result oriented no subtitui dezenvolvimentu ne’ebé impact oriented. Basá intesaun dezenvolvimentu ho deit result oriented sei lori dezastre bot ba Timor-Leste tuir senariu ne’ebé PNUD hakerek hahú kedas iha 1997 hanesan tuir mai;

‘Kuandu politiku sira halo politika dezenvolvimentu nian orientadu deit ba numeru kresimentu ekonomia (result oriented) no haluha tiha transformasaun sosial (impact oriented) sei hamosu; Jobless (la konsege kria kampu servisu ne’ebé ho dignidade iha area rurál sira hodi hamosu urbanizasaun), Ruthless (dez-igualidade sosial no numeru mukit aumenta), Rootless (laiha partisipasaun husi komunidade), Voiceless (ignora aspirasaun husi komunidade, la demokratiku no laiha transparansia), no Futureless (estraguz barak, kriminalidade ass até laiha futuru ne’ebé serteza tanba lakon esperansa).

 

Hanoin sira iha leten bele fo impaktu mos ba dezenvolvimentu area rurál ne’ebé sai nu’udar parte integrante husi rai doben Timor-Leste. Tanba ne’e hahú agora estadu tenki iha sensiblidade atu akomoda ezistensia sistema sosiu kultural no rekursu lokál nu’udar forza ba transformasaun sosial. Hanesan faktus no estudu barak-barak hatudu ona katak, dezenvolvimentu ho deit result oriented laos determinasaun final, maibe nu’udar meius atu hetan impact oriented hodi atinji mundansa ba moris no fin akontense transformasaun sosial total no kompletu.

 

Hodi nunee, resultadu husi dezenvolvimentu agrikultura la garanti bele sai nu’udar sasukat uniku atu atinji transformasaun sosial total no kompletu, basá esperiensia balun ne’ebe akontese iha area rurál sira hateten mudansa ekonomia deit la konsege resolve problema sosial sira iha area rurál, no karik atu hetan mos mudansa sosial tenki utiliza mos ezistensia potensialidade sosiu kultural no forza rekursu lokál ne’ebé bain-bain hanaran; Social Collectivism (esperitu tulun ba malu ho objetivu ida deit).

Ezistensia potensialidade sosiu kultural no forza rekursu lokál ne’ebé temi dadaun nu’udar oportunu diak ba estadu atu komesa no hahú aplikasaun modelu dezenvolvimentu ne’ebé sosiolojista sira hanaran farmers-first development. Prioritiza agrikultór no akomoda valor sosiu-kultural iha nia prosesu tomak. Konsidera agrikultór nu’udar sujeitu no fo atensaun ba nesesidades, badaen no rekursu lokál ne’ebé ema hanaran local indigenous. Basá Local indigenous difinidu nu’udar matének lokál ne’ebé bai-bain sira uza nu’udar way of life iha sira nia moris. Estadu tenki esforzu nafatin hodi hadiak no haforza ezistensia sistema kultura sosial no rekurzu lokál liu husi fo oportunidade ba komunidade rurál ne’ebe identiku ho agrikultór atu hetan asesu ba edukasaun (formal no laos formal), asesu ba kreditu no asesu ba input sira seluk ne’ebé nakait metin ho nesesidade dezenvolvimentu seitór agrikultura liu-liu individu agrikultór.

 

Se diak liu tan Politiku sira tenki radikal uit-oan, bainhira elabora politika dezenvolvimentu agrikultura tuir lalaok sira hanesan tuir mai ne’e: Ida, Hametin forza interasaun no interligasaun sosial hodi eleva agrikultór, nune’e agrikultór bele dignifikaan nu’udar sujeitu iha dezenvolvimentu seitór agrikultura. Rua, Haforza no prioritiza balansu dezenvolvimentu entre kuantidade ekonomia no kualidade sosiu-kultural, Tolu, mantein rekursu lokál nu’udar aset lulik no haforza kultura social learning no social capital ne’ebé ezisti nanis hahú kedas bei sira nia tempu.  Hat, hametin no haforza rurál hodi sai husi rurálity no sai rurál wellbeing liu husi dezenvolvimentu ne’ebe hahú husi rurál duni bazea ba nesesidades, badaen no rekursu lokál ezistenti.

Karik ne’e lao no hahú, fasilmente rurálity bele lakon tanba estadu hahú dezenvolvimentu husi duni rurál no atu dehan katak agrikultór hetan transformasaun sosial laos tanba resultadu ekonomia deit, maibe mos tanba hetan impaktu direita husi prosesu dezenvolvimentu ne’ebé akomodadu ho potensialidade sosiu kultural no forza rekursu lokál ne’ebé ezisti iha area rurál.

 

iklan
iklan

Leave a Reply

iklan
error: Content is protected !!