CNC, I.P no CHL asina akordu ba apoiu uma haat
DILI, 10 jullu 2023 (TATOLI)—Centro Nacional Chega, Institutu Públiku (CNC, I.P), segunda ne’e, asina nota entendimentu ho organizasaun Community Housing Limited (CHL) ba durasaun tinan-ida hodi harii uma ba sobrevivente kbiit laek hamutuk na’in-haat.
Tuir Diretór Ezekutivu CNC, I.P, Hugo Maria Fernandes, objetivu asina nota entedimentu ne’e ho parseiru tanba nu’udar organizasaun internasionál ne’ebé foku ajuda ema sira ne’ebé laiha kapasidade atu halo uma saudável.
“Ohin loron ita selebra akordu ida ho CHL hodi bele ajuda CNC, I.P ba atividade ida bolu harii uma memória esperansa, liu-liu ba sobrevivente sira hosi violasaun direitu umanu pasadu nian, ne’ebé ita identifika ona tinan ne’e iha na’in-haat sei hetan apoia uma,” Diretór Ezekutivu informa iha salaun CNC, I.P, Balide.
Notísia relevante : CNC, I.P sei apoiu uma ba sobrevivente haat
Akordu ne’e nu’udar pasu importante tanba liuhosi kooperasaun maka CHL bele halo uma saudável ba maluk sobrevivente sira ne’ebé CNC ho asosisaun sira seluk identifika ona.
“Orsamentu ne’ebé uza atu apoia sobrevivente maihosi Orsamentu Jerál Estadu ne’ebé aloka mai CNC, I.P, prevee ba uma-haat hamutuk $50.000,” nia akresenta.
Iha fatin hanesan, Diretór Nasionál CHL, Jocelino Belmarco AlvesBelamarco Alves, haksolok bele estabelese kooperasaun ne’e.
“Ami agradese ba CNC, I.P ne’ebé aprosima ona CHL atu halo dezeña tuir kritéria ne’ebé di’ak no barratu ba maluk sobrevivente vulnerável ne’ebé identifika ona iha munisípiu sira. Ami sei envolve badaen sira hosi lokál. Ita bele treina sira prosesu ida-ne’e la’o ona. Kooperasaun ne’e di’ak tebes atu halo sistema uma ida iha Timor-Leste, liu-liu futuru uma saudável no iha kondisaun di’ak. Kontratu ne’ebé ami halo ba tinan-ida de’it, maibé ami espera ba oin bele iha kontinuasaun hanesan programa nasionál ba nasaun nia di’ak,” nia adianta.
Uma sei dezeñu ho harii ho medida maizumenus metru 12×8, kompostu hosi kuartu tolu, baranda, han fatin, hariis fatin, inklui dapur iha li’ur.
Nune’e mós, Diretór Divizasaun Solidaridade ba Sobrevivente iha CNC, I.P, Nelson Miranda Seixas, relata, dadus sira rekolla hosi CNC, I.P hamutuk ho asosiasaun seluk hodi elabora dadus iha fulan kotuk, nune’e sobrevivente hamutuk 52 ho kategoria vulnerável, sei hetan uma.
“Ho orsamentu ne’ebé iha tinan ne’e ita prevee uluk ba uma-haat, enkuantu seluk kontinua ba tinan oin mai,” nia tenik.
Jornalista : Arminda Fonseca
Editora : Julia Chatarina
