Deputadu PN husu IX Governu buka-tuir Nicolau Lobato nia ruin
DILI, 10 jullu 2023 (TATOLI)—Membru Parlamentu Nasionál (PN), liuhusi Deputadu bankada FRETILIN, David Dias Ximenes ‘Mandati, husu IX Governu atu komunika ho Governu Indonézia hodi buka-tuir saudozu Nicolau Lobato nia ruin ho restu mortais saudozu sira seluk ne’ebé fó aan tomak iha luta libertasaun nasionál ne’ebé sira-nia restu mortál to’o ohin loron seidauk hetan.
Notísia Relevante: Horta: “Tempu ruma sei rezolve saudozu Nicolau Lobato nia restu mortál”
“Restu mortál, ida-ne’e hau ko’alia kle’ur kona-ba restu mortál Nicolau Lobato no mártires, ohin loron ita fó di’ak malu, horisehik no horibanrua de’it testamuña boot sira mai barak asiste serimónia tomada pose Governu foun, haree momentu oportonu ita hotu preokupa ho sira,” ’’Deputadu Mandati, hato’o liuhusi reuniaun plenária PN, segunda ne’e.
Nia dehan, antes ne’e hasai ona rezolusaun ida, maibé ninia kontuinuidade to’o agora lahatene, nune’e nia-parte hakarak reitera de’it ida-ne’e tenke tau atensaun ba deputadu sira iha ne’e nu’udar reprezentante povu hodi ezije IX Governu KOnstitusionál buka tuir restu mortál saudozu sira, nune’e haloot iha fatin dignu hodi fó valorizasaun.
“Hanesan atetude respeitu, ita kuaze iha serimónia ita hamrik fó minutu ida hakmatek dedika ba ita nia mártir sira,” nia dehan.
Deputada KHUNTO, Olinda Guterres, sekunda ho kestaun restu moráal saudozu sira-nian presiza tau atensaun hodi buka tuir hodi haloot iha fatin dignu.
Deputada CNRT, Cedelizia Faria dos Santosa sekunda mós kona-ba restu mortál sira ne’e importante tebes, tanba Timor-Leste agora ukun an ona tinan 20-resin maibé tenke tau mós importánsia ba restu mortál, tanba iha família barak simu tiha ona kondekorasaun maibé restu mortál sira-ne’e la hatene iha ne’ebé.
“Ita sente orgullu tanba ita simu ona kondekorasaun ba ita-nia família sira-ne’ebé mak mate ona, maibé ita lahatene sira-nia mate-isin sira-ne’e iha ne’ebé. Entaun, ha’u fiar Governu ida-ne’e, lideransa maun boot Kay Rala Xanana Gusmão nian ne’ebé halo ligasaun di’ak ho Indonézia ba oin iha tempu badak ka durante tinan lima, ita bele hetan ona sira nia restu mortál,” nia hateten.
Notísia Relevante: Mandati: Tempu ona Governu buka-tuir saudozu Nicolau Lobato nia ruin
Jornalista : Nelson de Sousa
Editór : Cancio Ximenes
