DILI, 10 jullu 2023 (TATOLI)–Diretór Ezekutivu Servisu Apoiu ba Sosiedade Sivíl no Auditoria Sosiál (SASCAS), Edvin Soares, hateten, Asosiasaun Antigu Alunu Universidade Udayana Timor-Leste (IKAYANA-TL, sigla indonéziu) mak sei halo jestaun ba Pura Girinatha iha Taibesi, bainhira ramata konstrusaun tinan ne’e.
“Pura Taibesi besik konklui ona, publikamente ema seidauk asesu maibé atu dehan Pura ne’e boot, kompara ho Pura iha Bali. Pura ne’e ho ninia ordenamentu kapas tebes. Fulan-dezembru tinan ne’e tenke finaliza no Asosiasaun IKAYANA mak sei halo jestaun,” Diretór informa ba Agência Tatoli, iha ninia knaar fatin, Palásiu Governu, segunda ne’e.
Notísia relevante :Prosesu konstrusaun Pura Girinatha Taibessi atinje ona 90%
Nune’e, Edvin Soares espera katak bainhira projetu ne’e konklui bele atrai vizitante barak tanba bainhira loke ona ba públiku sei aplika kobransa.
“Bainhira ramata tiha Pura ne’e sei fó benefísiu direta ba komunidade ne’ebé hela besik, katak sira bele fa’an hahán ruma, bee no ai-han seluk, nune’e vizitante sira ba vizita bele sosa no hatama rendimentu ba sira rasik,” nia akresenta.
Governu liuhosi SASCAS iha tinan 2021 apoiu fundu ba projetu ne’e hamutuk $1.207.958,18, daudaun projetu fíziku atinje ona 90%.
Jornalista : Antónia Gusmão
Editora : Julia Chatarina
