DILI, 10 jullu 2023 (TATOLI) – Diresaun Nasionál Dezenvolvimentu Parke Eskolár Ministériu Edukasaun (ME) halo distribuisaun materiál konstrusaun ba eskola sia iha Baucau, Ainaro, Ermera no Bobonaro, atu aselera projetu konstrusaun no reabilitasaun infraestrutura edukativa (PKRIE).
Diretór Nasional Dezenvolvimentu Parke Eskolár, Agostinho Soares, realsa katak eskola sia ne’ebé lokaliza iha munisipiu haat refere ninia konstrusaun seidauk remata tanba dalan atu asesu bá estabelesimentu eskolár ne’e difísil ho udan ne’ebé tau, tanba ne’e maka prosesu konstrusaun ne’e to’o agora seidauk konklui.
“Foin lalais udan para uitoan no ita konsege distribui ona materiál ba eskola sia ne’e, maibé depois distribuisaun hotu tiha udan komesa tun maka’as filafali, entaun PKRIE ne’e seidauk bele aselera,” Agostinho Soares dehan iha Vila Verde.
Responsavel ne’e salienta katak maske prosesu konstrusaun no reabilitasaun eskola sia ne’e seidauk hala’o tanba iklima, maibé eskola sira ne’e atinje ona obra 50%. “Karik tinan ida ne’e maka laiha impedimentu bele garante katak entre jullu no agostu klaran bele konklui ona”, afirma.
Eskola sia ne’e, tolu lokaliza iha Baukau, rua iha Ainaro, ida iha Ermera no tolu seluk iha Bobonaro.
Entre 2021 no 2022 iha PKRIE hamutuk 202 maka estabelese ona. Husi projetu refere konsege inaugura ona obra 170-resin no hela de’it 45 mak iha prosesu. Iha 2023, husi projetu 45 ne’e, iha 36 mak konklui ona no daudaun falta projetu sia, tanba kondisaun terrenu.
“Ba projetu PKRIE 36 ne’ebé konklui ona ne’e ita sei relata ba Ministra Edukasaun atu halo desizaun ruma hodi prepara ba inaugurasaun iha última faze”, hatete.
Notísia relevante: Ekipa konjunta monitoriza PKRIE rua ne’ebé paradu iha Ainaro
Jornalista: Tomé Amado
Editora: Maria Auxiliadora
