Ministériu Edukasaun sei foti desizaun hasoru empreza Timorindo
DILI, 10 jullu 2023 (TATOLI) – Diresaun Nasionál Dezenvolvimentu Parke Eskolár (DNDPE) sei aprezenta relatóriu no paresér ba Ministra Edukasaun, Dulce de Jesus, atu foti desizaun hasoru empreza Timorindo ne’ebé la hatudu ninia dezempeñu serbisu, tanba abandona konstrusaun Eskola Sekundáriu Jerál (ESG, sigla portugés) Hera.
“Ami sei aprezenta relatóriu no paresér tékniku ba Ministra Edukasaun ho Sekretáriu Estadu atu haree asuntu ne’e, tanba projetu konstrusaun eskola Hera ne’ebé kaer husi kompañia Timorindo Unipesoal Lda ne’e ami konsidera ba kategoria abandonadu”, Diretór Nasional Dezenvolvimentu Parke Eskolár, Agostinho Soares, hatete Tatoli, iha Vila Verde.
Resposavel ne’e dehan empreza ne’e kosidera tama ona iha lista metan (blacklist), tanba sira la hatudu ona dezempeñu serbisu durante ne’e. “Sira simu tiha kontratu no halo tan tiha deklarasaun iha banku katak sira-nian kapitál inisiál X katak bele duni atu kaer obra ne’e, maibé realidade progresu serbisu ne’ebé hatudu iha terrenu foin mak atinje 25%”, afirma.
“Ba ha’u kompañia hanesan ne’e ita labele fó tan ona serbisu ba sira, tanba empreza ne’e simu ona notifikasaun dala haat relasiona ho konstrusaun eskola Hera, maibé sira nunka kumpre to’o agora. Kompañia hanesan ne’e ami konsidera tenke tama ona blacklist”, nia salienta.
Agostinho Soares refere katak sei haree filafali rekizitu aprovizionamentu sira ne’ebé komprova tanba saida maka empreza refere ho sira-nian kapasidade ida lagarante atu kaer projetu sira, maibé bele prienxe fali kritériu no ikus mai la hatudu progresu signifikativu ba obra ne’ebé nia kaer.
Enjeñeiru no tékniku sira husi diresaun rasik bá halo ona inspesaun iha terrenu no laharee hetan iha buat ruma maka kompañia halo, maibé hetan de’it maka fatin ne’e abandonadu no laiha traballadór ida maka serbisu. “Ne’e duni, liuhusi relatóriu no paresér tékniku ne’ebé sei aprezenta ba superiór sira ne’e atu hein sira-nian desizaun ruma”.
Rekorde katak iha Governu anteriór, liuhusi Ministériu Edukasaun, Juventude no Desportu deside ona atu eskola ne’e hetan mós konstrusaun ho verba mai husi kapitál dezenvolvimentu.
Tanba ne’e, ho relatóriu ne’ebé diresaun sei submete ba superiór edukasaun atubele hetan desizaun ruma, nune’e bele loke fali prosesu foun hodi buka fali empreza ida di’ak atu aselera fali konstrusaun ba eskola ESG Hera ne’e.
Notísia relevante: Diretór Eskola Sekundária Hera husu MEJD investiga empreza Timorindo tanba la kumpre promesa
Jornalista: Tomé Amado
Editora: Maria Auxiliadora
