Populasaun Viqueque entrega rai ektare haat ba konstrusaun edifísiu CAFE
DILI, 10 jullu 2023 (TATOLI) – Komunidade Viqueque entrega rai ektare haat ba Ministériu Edukasaun (ME) atu konstrui futuru edifísiu Sentru Aprendizajen no Formasaun Eskolár (CAFE, sigla portugés).
Diretór Nasionál Dezenvolvimentu Parke Eskolár (DNDPE), Agostinho Soares, hatete maski rai ne’e oferese ona, maibé seidauk iha estatutu loos atu fó dalan ba diresaun aselera konstrusaun, nune’e Ministériu Edukasaun presiza kompleta uluk dokumentu atribuisaun rai refere bainhira obra la’o labele hamosu dezentendimentu.
“Rai ne’ebé maka ita-nia komunidade sira iha Viqueque oferese mai Ministériu Edukasaun ho ektare haat ne’e, ita konsidera seidauk rezolvidu tanba presiza kompleta lai dokumentu atribuisaun sira”, Agostinho Soares reiteira ba Tatoli, iha Vila Verde.
DNDPE hakarak atu aselera prosesu lansamentu ba rai ektare haat ne’e, tanba tama ona iha planu Fundu Infraestrutura 2024 nian no nia orsamentu inklui planta no kadernu enkargu prepara hotu ona.
Agostinho Soares hatete katak funsionamentu eskola CAFE hahú iha 2019 no to’o ohin loron instala hotu ona iha munisípiu 13, maibé Aileu no Viqueque maka seidauk iha edifísiu permanente.
Iha juñu, Ministru Edukasaun, Juventude no Despotu sesante, Armindo Maia, lansa ona fatuk dahuluk ba konstrusaun eskola CAFE ho andar ida iha rai ektare tolu ne’ebé lokaliza iha munisípiu Aileu ho orsamentu rihun $640.
Dirijente ne’e esplika katak eskola CAFE nia modelu iha munisípiu 13 ne’e tenke estruturadu, tanba ne’e ninia kustu ba obra boot uitoan kompara ho konstrusaun eskola sira seluk. Nune’e ba edifísiu CAFE prevee rihun $600-resin. Instalasaun ne’e sei konstrui ho sala aula 12, dormitóriu bá profesór sira, tanba manorin sira husi Portugál, hariis-fatin no eskritóriu.
Notísia relevante: Konstrusaun eskola CAFE iha Aileu ho verba rihun $640
Jornalista: Tomé Amado
Editora: Maria Auxiliadora
