Servisu Protesaun Sivíl Covalima disemina prevensaun dezastre naturál ba komunidade
COVALIMA, 10 jullu 2023 (TATOLI)–Diretór Servisu Munisipal Protesaun Sivil Jestasaun Risku Dezastre naturál, Quintino da Costa hateten, Servisu Munisipál Dezastre Naturál implementa ona programa diseminasaun informasaun kona-ba prevensaun dezastre naturál ba komunidade.
Notísia Relevante: ONG Ba Futuru anima labarik vítima dezastre naturál iha Zulo
“Ita- nia programa ne’ebé ita implementa mak hanesan disemina informasaun ba ita-nia komunidade hodi hasa’e lidér komunitária sira-nia kuñesementu halo prevensaun, nune’e komunidade prepara diakliu bainhira akontese dezastre naturál hanesan tipu rai halai, sira bele muda fali ba fatin seluk,” Quintino da Costa hateten ba Agência Tatoli, iha nia kna’ar fatin Bairru Costa, segunda ne’e.
Servisu dezastre naturál hala’o atividade diseminasaun informasaun no hala’o mós enkontru regulár no hala’o akompañia hodi evakua vítima sira-ne’ebé afetadu ba dezastre naturál.
“Ita halo sensibilizasaun enkontru avaliasaun durante trimestre dahuluk no daruak akompaña ita-nia vítima sira-ne’ebé afetadu ba dezastre no halo koperasaun ho autoridade protesaun sivil no parseiru sira oinsá atu tulun vítima dezastre natural sira,” nia dehan.
Tuir dadus, iha trimestre dahuluk, Servisu Munisipál Protesaun sivil Jestaun no Dezastre Naturál rejista uma-kain ne’ebé afeta ba dezastre naturál hamutuk 131 ne’ebe ho tipu dezastre naturál hanesan Anin boot estraga uma 121, Inséndiu Rua (2), Rai Halai hitu (7), Aat Naton 19, aat kmaan 64 no aat totál 46 ne’ebé hetan hotu ona apoiu emerjénsia.
Entertantu, udan-boot ne’ebé akontese iha loron 3-4 fulan-jullu tinan 2023 lori tristeza ba komunidade tanba komunidade sai vítima hodi lakon hela fatin no seluk tan.
Durante akontese udan, komunidade suku Zulo akontese dezastre ho tipu rai halai ne’ebé afeta ba komunidade postu sira hanesan Postu Tilomar, postu Suai, postu Maucatar seidauk hetan apoiu emerjénsia maibé postu Zumalai mak hetan uluk ona apoiu emerjénsia.
Jornalista : Celestina Teles
Editór : Cancio Ximenes
