OÉ-CUSSE, 10 jullu 2023 (TATOLI) – Sekretariadu Tékniku Administrasaun Eleitorál (STAE), Rejiaun Administrativa Espesiál Oé-Cusse Ambeno (RAEOA), daudaun ne’e rejista ona sidadaun na’in-30 maka prodús ona kartaun eleitorál hodi partisipa iha eleisaun xefe suku tinan 2023 ne’e.
Notísia relevante: STAE Oé-Cusse rejista eleitór 9,978 la vota
Ofisiál Informasaun Téknologia (IT) iha STAE Oé-Cusse, Grogoria dos Santos Neno, hateten, dezde eleisaun parlamentár ne’ebé akontese iha loron 21 maiu liubá, parte STAE munisípiu simu kedas orientasaun hosi nasionál hodi reativa resenseamentu eleitorál no atualizasaun baze dadus.
“Ami reativa fali atividade resenseamentu eleitorál no atualizasaun baze dadus, ba resenseamentu eleitór foun sira, no sira-ne’e atu halo atualizasaun dadus komesa iha loron 06 juñu to’o agora sei la’o hela, nune’e mós atendimentu loron-loron hosi segunda to’o kinta kada semana, durante ami hala’o resenseamentu, agora daudaun na’in-30 ona mak mai halo ona kartaun eleitóral,” nia dehan iha Oé-Cusse, segunda ne’e.
Tuir nia, atualizasaun dadus hanesan muda dadus eleitorál ba suku no aldeia inklui naran no data moris no mós kartaun tohar ka aat no lakon, nune’e mós ba resenseamentu eleitór foun ba sira-ne’ebé idade foin atinje 17.
“Agora sira-ne’ebé foin mak mai trata atu hetan kartaun eleitorál ne’e, sira bele partisipa ona iha eleisaun suku ne’ebé tuir kaléndariu sei realiza iha tinan 2023 ne’e,” nia afirma.
Nia esplika, durante iha prosesu atendimentu, difikuldade ne’ebé parte STAE enfrenta maka, ba eleitór sira atu trata dokumentu, tenke kumpri kritéria ida molok hasai kartaun eleitorál presiza sertidaun nasimentu no sertidaun RDTL no deklarasaun hosi xefe suku.
Kona-bá atualizasaun dadus hanesan kartaun lakon, presiza deklarasaun hosi xefe suku hosi PNTL kompleta ho sertidaun nasimentu no RDTL, hanesan mós sira-ne’eb’e kartaun aat no mudansa hela dadús eleitorál.
“Maibé iha eleitór balun seidauk iha dokumentu sira hanesan sertidaun, entaun susar tebes atu hetan kartaun eleitorál ne’e, tanba kritéria hosi maka hanesan ne’e, tenke kumpri atu haree tuir dadus sira,” nia katak.
Notísia relevante: Eleitór Oé-Cusse 54.291 elijível vota iha eleisaun parlamentár
Jornalista: Abílio Elo Nini
Editór: Evaristo Soares Martins
