CNC, I.P realiza konferénsia sientífika 2023 dezenvolvimentu istória komunidade
DILI, 11 jullu 2023 (TATOLI)—Centro Nacional Chega, Institutu Públiku (CNC, I.P) tersa ne’e, realiza atividade konferénsia sientífika 2023 kona-ba dezenvolvimentu istória komunidade hodi hamosu balansu narativa iha istória tomak.
Diretór Ezekutivu CNC, I.P, Hugo Maria Fernandes, hateten, konferénsia realiza tanba hahú iha tinan 2017, narativa istória laiha ballansu ein termu sé mak iha oportunidade no kapasidade atu hakerek memória sira hodi ema barak lee.
“Ita halo konferénsia atu konvida péritu istória sira hosi universidade Austrália, Portugal, Brazíl, no Kanada hodi mai fahe sira-nia esperénsia no matenek kona-ba oinsá sira hakerek istória komunidade nian,” Diretór Ezekutivu informa iha salaun CNC, I.P, Balide.
CNC, I.P tinan-haat ona hahú hakerek dokumentu memória ema iha nível pesoál no suku.
“Ho ida-ne’e konvida ema matenek na’in sira mai fahe esperiénsia halo peskiza ba istória luta nian iha nível suku ka komunidade. Tanba daudaun ne’e ita iha livru barak kona-ba ema-boot sira, maibé komunidade iha nível suku oinsá partisipa ka kontribui ba luta ne’e sei menus, ho ida-ne’e atividade ne’ebé ita realiza ho objetivu atu narativa istória nian ne’e iha balansu,” nia akresenta.
Notísia relevante : CNC hakerek ona istória rezisténsia husi komunidade urbana ba luta ukun rasik-aan
Ho kapasidade ne’ebé iha, CNC, I.P hakerek ona istória suku hamutuk 10,ne’ebé menus tebes, nune’e ho atividade sira ne’e nafatin husu matenek na’in no estudante sira iha kada suku iha territóriu laran hodi halibur malu no ida-idak bele dokumenta istória suku nia kontribuisaun ba ukun-an.
Suku 10 resin ne’ebé daudaun ne’e CNC, I.P hakarek nia istória no públika ona mak istória hanesan Bairro-Pité, Colmera, Vila-Verde, Comoro, Lahane no seluk tan.
“Tinan ne’e ita hakerek tan suku balun atu públika hanesan Laclo, Maulau, Mehara no seluk tan. Ho ida-ne’e, hakarak rona péritu sira-nia opiniaun ba inisiativa ne’e,” nia tenik.
Biban ne’e, Jerente institutu ne’e husu ba joven no matenek na’in sira ne’ebé daudaun ne’e iha Dili, bainhira hakerek istória karik husu komunidade sira-nia envolvimentu iha funu hanesan klandestina lori ai-moruk, ai-han, no seluk tan, tanba ida-ne’e mak presiza dokumenta.
Iha fatin hanesan, Ministru Edukasaun Superiór Siénsia no Kultura, José Honório da Costa Pereira, hateten, atividade ne’e importante tebes atu joven sira bele apreende esperiénsia sire.
“Jerasaun foun sira presiza apreende esperiénsia barak hosi péritu sira ne’e hodi halo dokumetasaun ba istória sira tanba istória pasadu luta ba libertasaun ne’e ema barak mak kontribui,” nia fó hanoin.
Nune’e, hanesan parte Governu, ba oin Ministru kompromete sei fó apoiu tomak ba atividade CNC, I.P atubele hakerek istória, nune’e jerasaun foun bele hatene no karik bele istória sira ne’e tama hotu iha kurríkulu nasionál ida bele halo estudante hosi ensinu báziku to’o superiór bele apreende.
“Péritu internasionál sira-nia prezensa ajuda tebes timor-oan sira tanba peskiza sira hanesan ne’e importante ajuda joven sira bele dudu dezenvolvimentu iha siénsia,” José Honório tenik.
Jornalista : Arminda Fonseca
Editora : Julia Chatarina
