EDUKASAUN, DILI, HEADLINE

CNC hakerek ona istória rezisténsia husi komunidade urbana ba luta ukun rasik-aan

CNC hakerek ona istória rezisténsia husi komunidade urbana ba luta ukun rasik-aan

Diretor Ezekutivu CNC, I.P, Hugo Fernandes. Imajen Tatoli/Egas Cristóvão

DILI, 11 jullu 2023 (TATOLI) –  Centro Nacional Chega (CNC) hakerek ona istória luta husi komunidade urbana iha nivel suku to’o aldeia husi dokumentu memória ne’ebé maka CNC rekolla ona durante tinan haat nia laran.

Diretór-Ezekutivu CNC, Hugo Maria Fernandes, haktuir ema ohin loron hakarak lee mak livru sira kona-ba partisipasaun luta ka rezisténsia husi grupu boot sira-nian, maibé livru kona-ba atividade komunidade nian iha nivel suku, liuliu oinsá maka sira partisipa no kontribui ba iha luta ba ukun rasik-aan ne’e laiha.

Tanba ne’e maka husi dokumentu memória sira ne’ebé maka CNC konsege rekolla ne’e hakerek ona ba livru istória rezisténsia husi suku lubuk ida iha Dili nian mak Comoro, Motael, Bairro Pité, Vila Verde no Colmera. “Agora, ita kontinua hakerek tan istória husi suku Lahane nian depois husi munisípiu maka Mehara iha Lautém, Mau-lau iha Ainaro no Laclo iha Manatuto.

Husi atividade hakerek istória luta komunidade iha nivel suku no aldeia sira iha Timor-Leste ne’e bazeia ba peskiza ida, maibé istória luta ne’ebé sira halo iha tempu rezisténsia ne’ebé CNC hakerek ona ne’e seidauk hetan ninia klareza.

Nune’e, CNC konvida peritu sira husi parte istória nian atu halo diskusaun kona-ba teoria no prátika, tanba durante tinan haat nia laran CNC konsege dokumenta ona memória ema nian iha nivel pesoál no suku hodi hakerek ba istória.

“Ita presiza hetan opiniaun husi peritu internasionál sira-nian ba inisiativa sira ne’ebé ita halo ona. Objetivu boot ne’ebé CNC iha maka oinsá bele iha narativa istória ne’e balansu entre ema boot no ema baibain sira iha foho no knua sira ne’ebé dook husi sidade ho sira-nian luta ba ukun rasik-aan ne’e bele signifikante, bele kontribui ba istória nasionál”, Hugo Fernandes dehan iha Balide.

Iha tinan ida ne’e, CNC hamutuk ho peritu sira husi Austrália, Portugál, Brazíl no Kanadá sei fahe sira-nian esperiénsia no matenek oinsá maka iha sira-nian rain bele halo prátika hakerek istória komunidade sira-nian.

Haree fali ba istória pasada Timor-Leste nian kuaze suku hotu iha país nian, liuliu ema envolve hotu iha rezisténsia, bele haree de’it husi estrutura rezisténsia nian hanesan selcom, nurep ne’e hatudu ona katak luta Timór nian ba ukun rasik-aan ne’e tama to’o nivel aldeia sira.

“Depende oinsá maka atu hakerek, tanba Centro Chega rasik liuhusi ninia kapasidade ne’ebé iha komesa hakerek ona istória luta komunidade iha suku lubuk ida ona. Agora, CNC husu ba matenek-na’in sira iha suku, inklui estudante atu halibur malu ona hodi buka hakerek ona istória luta urbana ne’ebé katuas, ferik, joven sira uluk halo iha suku sira”, nia enkoraja.

Hugo Fernandes realsa tan katak presiza ko’alia ho autór sira ba luta rezisténsia iha kada suku oinsá sira-nian kontribuisaun ba luta naruk ne’e to’o hetan ukun rasik-aan. “Presiza hatene ho maneira saida sira bele halo luta iha nivel suku no aldeia ne’e. Tanba ne’e presiza dokumenta istória sira ne’e atubele husik hela bá jerasaun foun sira iha futuru”, afirma.

Jornalista: Tomé Amado   

Editora: Maria Auxiliadora

iklan
iklan

Leave a Reply

iklan
error: Content is protected !!