Deputadu Luis Roberto husu IX Governu solusiona kaderneta pasaporte
DILI, 11 jullu 2023 (TATOLI)—Deputadu hosi bankada KHUNTO iha Parlamentu Nasionál, Luis Roberto, kontinua husu IX Governu atu tau atensaun hodi solusiona problema kaderneta pasaporte, nune’e bele fó atendimentu ba populasaun sira.
Notísia Relevante: MJ promete rezolve kaderneta pasaporte no blanku BI iha loron 100
“Problema nasionál ida kona-ba ita-nia kaderneta ba pasaporte laiha ka seidauk iha, halo impedimentu boot ida ba ita-nia estudante sira no mós ita-nia sidadaun sira-ne’ebé moras no ita-nia joven sira-ne’ebé hakarak ba serbisu iha rai-li’ur. Tanba, serbisu rai-laran laiha ne’e hanesan impedimentu boot ida ba sira,” Luis Roberto levanta liuhosi reuniaun plenária PN, tersa ne’e.
Tanba ne’e, bankada KHUNTO husu ba IX Governu Konstitusionál se bele iha kompromisu loron 12o nia laran ne’e bele aselera hodi solusiona kaderneta pasaporte ne’ebé to’o oras ne’e seiduka iha.
Nia dehan, IX Governu Konstitusionál seidauk aprezenta nia programa mai iha Parlamentu Nasionál, maibé bazeia ba artigu 108 konstituisaun RDTL númeru 2 hateten, depois Governu sira tiha nia kna’ar iha loron 30 nia laran tenke aprezenta ninia progama Governu.
“Tanba ne’e mak ami bankada KHUNTO, karik ida-ne’e iha faze preparasaun Governu atu fó nia programa mai, husu ba Ministériu Justisa atu oinsá bele tau mós trata ita-nia kaderneta pasaporte. Tan buat ne’e kiik-oan ida, ne’e nasaun, maibé pasaporte dalaruma laiha,” nia hateten.
Deputadu hosi banakda opozisaun ne’e hateten, klaru iha Governu anteriór la alkansa kestaun ne’e no tuir informasaun ne’ebé iha katak iha ona kontratu ho kompañia internasionál balun, atu emite kaderneta pasaporte iha fulan setembru, nune’e IX Governu KOnstitusionál ne’e presiza tau prioridade.
Jornalista : Nelson de Sousa
Editór : Cancio Ximenes
