DILI, 01 jullu 2023 (TATOLI) – Ministru Justisa (MJ) Amandio Benevides sei buka rezolve uluk problema pasaporte no blanku ba Bilete Identidade (BI) iha servisu loron 100 nia-laran.
“Prioridade ida mak atu responde lais nesesidade povu nian liuliu ezijénsia kaderneta pasaporte no blanku ba bilete identidade ne’ebé agora daudaun la iha, atu bele ajuda oan sira ne’ebé mak ba eskola, ema sira ne’ebé mak atu ba trata sira nia saúde iha rai liur no ba ema sira ne’ebé mak presiza atu sai ba rai liur”, Ministru Justisa Amandio Benevides hafoin simu pose hanesan Ministru Justisa foun iha Palásiu Prezidensiál Aitarak-Laran, sabadu ne’e.
Nia esplika, Governu dasia mai ho prioridade ne’ebé hateten iha diskursu Primeiru-Ministru Xanana Gusmão katak IX Governu Konstitusionál ho nia misaun no vizaun atu bele rezolve problema ne’ebé mak agora daudaun iha.
“Em particular, problema ne’ebé mak mosu iha área justisa mak hanesan kaderneta pasaporte no mós bilete identidade. Agora hanesan Ministru Justisa, ha’u sei koordena ho diresaun sira ne’ebé tutela iha Ministériu Justisa, atu buka esforsu hotuhotu no atu buka tempu ne’ebé mak adekuadu atu bele hetan kaderneta sira ne’e”, governante ne’e afirma.
Amando Benevides kompromete sei servisu másimu atu bele garantia katak iha tempu ne’ebé adekuandu Timor-Leste bele iha kaderneta atu bele fasilita nesesidade povu nian.
“Ohin ha’u foin simu pose, ha’u seidauk hetan relatóriu hosi diresaun sira liuliu dirijente sira Ministériu Justisa nian, iha segunda semana oin ha’u sei halo reuniaun Konsellu Konsultivu Ministériu Justisa atu buka medida hodi bele aselera servisu sira ne’ebé mak atu bele hetan kaderneta foun no mós blanku ba bilete identidade”, nia subliña.
Aleinde ida ne’e, nia kompromete sei avalia servisu Polísia Sientífika Investigasaun Kriminál (PCIC, sigla portugés) durante servisu iha loron 100 nia-laran.
Nia haktuir, Primeiru-Ministru sei avalia servisu PCIC nian, tanba ne’e sai prioridade Ministériu Justisa iha loron 100.
Tanba ne’e, hanesan MJ foun sei tur hamutuk ho dirijinte hotu ne’ebé servisu iha ligasaun ho investigasaun kriminál, servisu sira ne’ebé mak liga ba polísia nian hanesan Prokuradór Jerál Repúblika ne’ebé mak hanesan nain ba asaun penál.
Jornalista: Natalino Costa
Editór : Zezito Silva
