DILI, 11 jullu 2023 (TATOLI)—Empreza The Carrying Water Project (CWP), Global LTD hosi Japaun planeia ona iha futuru sei halo kooperasaun ho Bee Timor-Leste, Empreza Púlika (BTL, E.P) hodi dezenvolve bee-moos iha Timor-Leste.
Prezidente BTL,E.P, Carlos Peloi dos Reis, hetan vizita hosi ekipa empreza The Carrying Water Project, Global LTD hosi Japaun, iha loron segunda (10/07).
Tuir Prezidente CWP Global LTD, Kon Yosuke, vizita ne’e hodi hetan informasaun hosi BTL, E.P kona-ba sistema kanalizasaun bee-moos no bee-fo’er iha Timor-Leste tanba ba futuru CWP Global LTD hakarak serbisu hamutuk.
“Ami iha planu atu halo negósiu iha Timor-Leste, liu-liu iha área kanalizasaun bee-moos no bee-fo’er, ho objetivu ida-ne’e mak ita partilla informasaun ba malu ligadu ho setór bee-moos iha Timor-Leste inklui sistema tratamentu bee-fo’er (águas residuais),” Kon Yosuke relata liuhosi nota ne’ebé Agência Tatoli asesu, tersa ne’e.
Notísia relevante : BTL, E.P hahú dada bee-moos ba xefe família besik 600 iha Soibada
Nia dehan, antes CWP, Global LTD atu serbisu hamutuk ho BTL, E.P, tenke husu informasaun atuál kona-ba kanalizasaun bee-moos no bee-fo’er iha Timor-Leste tanba antes ne’e rona katak iha Timor-Leste presiza mós sistema atu halo manutensaun ba kanalizasaun nian, liu-liu atu hamoos kanál nia-laran.
“Tanba ne’e ami mos iha interese ba ida-ne’e no ba oin ami hakarak kolabora hamutuk ho Bee Timor-Leste,” nia Akresenta.
Iha biban hanesan, Prezidente BTL,E.P, Carlos Peloi dos Reis, apresia no agradese ba parseiru ninia inisiativa ne’ebé hakarak kolabora hodi harii sistema bee-moos.
“Kolaborasaun ne’e di’ak tebes, bainhira ita serbisu hamutuk sei distribui bee-moos ne’ebé di’ak ba ita-nia komunidade,” nia tenik.
Jornalista : Arminda Fonseca
Editora : Julia Chatarina
