Autoridade Covalima haloot ona matebian deskoñesidu iha semitériu Suai
DILI, 12 jullu 2023 (TATOLI)—Autoridade munisípiu Covalima, kuarta ne’e, ezekuta despaixu orientasaun hosi Prokuradoria Primeira Instánsia Covalima ne’ebé sai na’in ba prosesu ne’e, hodi haloot mate-isin ka matebian deskuñesidu ne’ebé komunidade Covalima hetan iha ponte Lomea ne’e iha semitériu públiku Suai.
Notísia Relevante: Ospitál Suai konserva mate-isin ne’ebé hetan iha ponte Lomea iha konjeladór
Serimónia fúnebre ne’e hala’o, Komandu PNTL munisipiu Covalima lidera hosi Komandante Operasaun, Inspetur Xefe Polisia Juaquim da Costa, ho ekipa koordena kedas ho Administradór Munisipiu Covalima, hafoin hamutuk ho ekipa MSSI munisipiu Covalima no ekipa hosi Ospitál Referál Suai, hodi halot mate-isin deskonesidu ne’ebe komunidade sira hetan iha sábadu (08 jullu 2023) liuba iha Mota Lomea, suku Beco nian.
“Tamba razaun ho kondisaun mate-isin ne’e hahú nabeen no dodok ona, entaun ho ida-ne’e mak Prokuradoria Primeira Instánsia Covalima hatun despaixu orientasaun no ekipa ezekuta hodi haloot mate-isin deskoñesidu refere iha semiteriu púubliku Mata Air-Suai,” refere nota ne’ebé Agência Tatoli asesu, kuarta ne’e.
Razaun, tanba hafoin mate-isin ne’e lori mai konserva iha mortuáriu ospitál Referál Suai no to’o ohin loron, laiha komunidade ka familia ruma mak buka-tuir, maske autoridade Covalima no parte hosi ospitál habelar ona informaaun kona-ba mate-isin ne’e iha meu komunikaaun sosiál no mídia sosiál sira.
Jornalista : Osória Marques
Editór : Cancio Ximenes
