Governu sei revee kontratu dezenvolvimentu Aeroportu Comoro
DILI, 12 jullu 2023 (TATOLI)–Ministru Transporte no Telekomunikasaun, Miguel Manetelu, hateten, Governu sei revee kontratu ba dezenvolvimentu Aeroportu Internasionál Prezidente Nicolau Lobato, Comoro.
“Ha’u refere de’it ba programa númeru 13 ne’ebé iha loron-120 ne’e temi kona-ba ida-ne’e, iha liafuan ruma presiza subliña katak revee no haree filafali kontratu ne’e karik presiza, iha liafuan ida termu jurídiku nian, ha’u mós ladun apár maibé ami buka atu haree buat ne’e katak Governu iha mandatu ikus iha autoridade atu asina kontratu ka lae,” Ministru hateten iha Palásiu Governu, kuarta ne’e.
Notísia relevante : Governu selebra kontratu ho empreza tolu ba dezenvolvimentu Aeroportu Comoro
Governante ne’e konsidera, asuntu ne’e nu’udar ‘trabalho da casa’ ida ba kada membru, ne’ebé nu’udar membru Governu presiza oferese informasaun sufisiente ba Primeiru-Ministru.
Antes ne’e, Primeiru-Ministru, Kay Rala Xanana Gusmão, liuhosi ninia diskursu iha ámbitu simu pose iha loron 01 jullu 2023, deklara katak iha loron-120 nia laran sei halo auditoria no revee filafali, karik presiza duni ‘negósiu’ boot sira ne’ebé Governu halo ona iha finál mandatu inklui Aeroportu Dili tanba nu’udar konsidera hanesan Governu jestaun, katak Governu sesante laiha ona autoridade jurídika atu asina kontratu ruma.
Jornalista : Antónia Gusmão
Editora : Julia Chatarina
