DILI, 12 jullu 2023 (TATOLI)—Konsellu Superiór Ministériu Públiku hafoin reúne iha sesaun ordiária iha loron 10 jullu 2023, halo deliberasaun liuhosi unanimidade hodi klarifika katak servisu Ministériu Públiku (MP) la’ós atu halo prosesu krime kontra knaar jornalista.
“La eziste iha órgaun ka servisu Ministériu Públiku nian kualker prosesu krime kontra jornalista relasionadu ho ezersísiu sira-nia funsaun,” refere nota klarifikasaun ne’ebé Agência Tatoli asesu, kuarta ne’e.
Konsellu Superiór hato’o kestaun ne’e liga ho notifikasaun hosi MP ba Xefe Redasaun mídia online Hatutan, Francisco Simões da Costa Belo no Jornalista, Rogério Pereira Cárceres, relasiona ho publikasaun produtu jornalístiku.
“Ministériu Públiku la halo prosesu krime ruma Xefe Redasaun mídia online Hatutan, Francisco Simões da Costa Belo no Jornalista, Rogério Pereira Cárceres, no la konstitui sira hanesan arguidu, hafoin publikasaun notísia ho títulu ‘Deskonfia PJR Alfonso Lopes, ho nia Asesór Jurídiku Óscar Tavares Uza osan Estadu halo Viajen Privadu iha Portugal,’” esplika nota ne’ebé asina hosi Prezidente Konsellu Superiór Ministériu Públiku no Prokuradór-Jerál Repúblika (PGR, sigla portugés), Alfonso Lopes.
Aleinde ne’e, Konsellu Superiór fó sai nota klarifikasaun tanba haree ba notísia, komentáriu no informasaun sira liuhosi komunikasaun sosiál oin-oin relasionaho inkrisaun ba Rogério Pereira Cárceres no Francisco Simões Belo da Costa, iha ámbitu prosesu inkéritu disiplinár ida, ne’ebé ninia prosedimentu sira la’o hela iha Konsellu Superior Ministériu Públiku, to’o ikus mai hamosu dúvida iha opiniaun públiku.
Notísia relevante : Xefe Estadu konsidera kriminaliza produtu jornalístiku la’ós prioridade ba nasaun
Liuhosi deliberasaun númeru 41/KSMP/2023 hosi Konsellu Superiór Ministériu Públiku, loron 29 maiu 2023, halo tiha prosesu inkéritu disiplinár internu ida hodi apura responsabilidade funsionáriu no ajente Servisu Apoiu Tékniku no Administrativu Prokuradoria-Jerál Repúblika nian relasiona ho divulgasaun públika dokumentu no informasaun ne’ebé protejidu hosi sijilu profisionál, ne’ebé ninia prosedimentu sira la’o hela iha Servisu Inspesaun MP.
“Iha ámbitu hosi prosesu inkeritu disiplinár ida-ne’e mak halo tiha inkirisaun ba sidadaun Rogério Pereira Cárceres no Francisco Simões da Costa Belo ho kualidade hanesan sasin, tanba sira iha koñesimentu kona-ba faktu hirak ne’ebé sai nu’udar objetu ba prosesu inkéritu disiplinár ne’e,” nota hosi PGR esklarese.
Aleinde ne’e, relasionadu ho notísia sira ne’ebé publika hosi Jornal Timor Post no Independente iha loron 03 jullu 2023, atribui tiha ba Prezidente Asosiasaun Jornalista Timor-Lorosa’e (AJTL), Konsellu Superior Ministériu Públiku esklarese katak MP laiha kompeténsia legál atu define krime sira, tanba matéria krime sira nu’udar kompeténsia Parlamentu Nasionál no Governu, liuhosi autorizasaun Parlamentu Nasionál.
Jornalista : Antónia Gusmão
Editora : Julia Chatarina
